 |
| Emeterio T. Rumbaoa Pebrero 14, 191o-Pebrero 27, 1996] |
Napili a Daniw Ita a Lawas
Ita ta awankan, palubosannak.
Wen palubosannak, adu ti rumbeng
A makita ken aramidek.
Saanmon nga igalut bagim kaniak
Ta ammok nga awankan, dikan
Makita, dagiti laeng luak
Ti mangipalagip iti kaaddam kaniak.
Agrag-oka ta adu dagiti namaris
A tawen a nagkadduaanta;
Intedko kenka 'toy ayatko
Ta sika a mismo ti arkitekto ti kinataok
Mabalin a pugtoam no kasanot' kaadu
Ti impaaymo kaniak a ragsak ta mariknak ida
Ket agyamanak iti dayta nga ayat--
Ti ayatmo, isut' biagko.
Ngem nadanonanen ti oras
Nga agbaniagaka nga agmaymaysa,
Agladingitka, lumdaangak--
Ngem apagbiit la dayta.
Ket no ti panagleddaangko ti nasken,
Bay-am nga agbati ti ladingit kaniak
Tapno maliwliwa, agtalekka
Ta Sika ti Siak, Siak ti Sika.
Wen, nasayud laeng panaginnadayo
Ket sapay koma ta mabendisionan
Dagiti lagip nga imbatim iti pusok,
Patiek, saanka nga adda iti adayo
Ngem agtultultuloy ti biag;
No kasapulan ken awaganka
Ammok nga umayka uray dika makita,
Maaprosanka ta addaka laeng iti asidegko
Ne, denggem ti itiptipa ti pusok;
Naikawesak kenka idi rugiam
Nga asaken ti dana a kaikariam,
Ti ayatko agnanayon a sibabalud kenka
Ket aniaman a nagun-odko a balligik,
Balligim metten. Bayat a taltalaytayem
Ti dana nga agturong iti nagloriaan
A pagtaengan, ammok, taliawennak a nalikudam--
Panawen lat' mangibaga
Nga agsarangtanto manen iti rupanrupa,
Kablaawannak a siisem nga agkuna:
"Naragsak nga isasangbaymo, Anakko!"
ITA TA AWANKAN
[Pananglagip ken ni Emeterio]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[CR/RRR.Maui.o2.2o12]
No comments:
Post a Comment