[Nabulod ti ladawan a naaramat] |
ADDA dua a klase ti kinabulsek no panunotentayo: ti "pisikal a kinabulsek" ken ti "espiritual a kinabulsek." Ngem ania koma ti pagdiperensiaan dagitoy?
Ti pisikal a kinabulsek iladawanna ti naitaoan/wenno mayanak a bulsek, idinto ti espiritual a kinabulsek- "bulsek a simamata," kayatna a sawen, uray kitkitaenna ti maysa a banag, aginkukuna a dina makita [nangruna no pakaseknan iti panangtulong] ket amang a makuna a nadagdagsen ti basol daytoy ngem ti mayanak a "physically blind."
Nakaladladingit ngem adut' tao a mayanak a bulsek. Nupay kasta, kaaduan kadagiti bulsek ti mapukaw ti panagkitada gapu iti aksidente, pannakadunor wenno sakit.
Uray aniaman ti makagapu iti panagbulsek, nasken unay nga awaten ti tao a maseknan ti kinabulsekna ket sursuroenna ti agbiag a kasta. No dumteng daytoy nga in-inut, nasayaat no mabigbig ti tao ti mapasamak tapno maisagana ti bagina iti tiempo a pannakapukawna a mamimpinsan ti panagkitana.
Babaen ti umisu a pannakasursuro, mabalin nga aramiden ti maysa a bulsek dagiti adu a bambanag tapno matulonganna ti bagina, nangruna no adda papananna a disso ken/wenno iti aglawlawna.
Masansan met a makapagbaniaga a maymaysa ken makagatang kadagiti kasapulanna. Mabalinna a kawesan ti bagbagina ken ibaga ti oras babaen iti maysa a naisangsangayan a pagorasan a mabalinna nga arikapen.
Kankanayon koma a mangitugot iti puraw a sarukod a pangarikapna ti dalanna ken kadagiti bambanag nga adda iti aglawlaw kenkuana bayat ti pannagnana. Dayta a puraw a sarukod ti tanda kadagiti agmanmaneho iti lugan nga isut' addaan iti kalintegan nga umuna a lumasat iti dalan iti amin a tiempo.
Mabalin a kasapulan met dagiti bulsek nga ubbing ti naisangsangayan a panagadal bayat kadagiti nasapa a tawenda, ngem kas iti kasapa a pannakabalinna, makitiponda iti klase a regular ken makitiponda kadagiti padada nga ubbing a kapatadada. Inton dumakkeldan, maisuro kadakuada ti tumutop a trabaho.
Nasarut ti panagpampanunot dagiti kaaduan a bulsek ket paggaayatda ti tumipon kadagiti makakita a tattao. Matamingda koma kas regular a tattao ket sursuroenda koma ti agbiag a saan unay nga agsanggir iti padada a tattao agingga iti pannakabalinna.
Mabalin met a matulongan dagiti gagayyem ti maysa a bulsek babaen iti panangibasada kenkuana kadagiti surat, libro ken pagiwarnak. Idinto ta iyasideg ida ti radio kadagiti mapaspasamak ditoy lubong, adu dagiti panagpaay a pagyamanda unay.
Saan koma a maibaon ti maysa a bulsek nga ubing iti maysa a naisangsangayan a pagadalan. Masansan a nasaysayaat ti banagenna iti bukodna a pagadalan.
No mabalin la ketdi, mapagtalinaed iti pagtaengan, no la ketdi maited kenkuana ti naisangsangayan a tulong nga agpaay kadagiti adalenna. Mabalin a saan a makadur-as a kas kapardas ti makakita nga ubing.
Saan koma a maay-ay ken kasta met a saan koma a maiwalin agsipud ta mabalinna a tamingen ti bagbagina agraman ti umisu a pannakasursuro ken no maikkan la ketdi iti gundaway.*
MAIPAPAN ITI KINABULSEK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
No comments:
Post a Comment