Surat [Epistola/Karta] ni Pablo kadagiti taga-Tesalonica
2 Tesalonica 3: 1-12
 |
| [Nabulod ti ladawan a naaramat] |
Ti Tarigagay ni Pablo a Sumarungkar Manen Kadakuada
Isut' gapuna nga idi dikam makaibturen, nagnunumoanmi nga imbaon ni Timoteo a kabsattayo a katrabahoan iti Dios iti pannakaisaba ti Naimbag a Damag maipapan ken Cristo; dakami laeng ti nagbati idiay Arenas. Imbaonmi a mangparegta ken mangpapigsa iti pammatiyo, tapno awan koma ti sumina gapu kadagitoy a pannakaparigat. Ammoyo a naituding a sagabaentayo dagitoy a pannakaidadanes. Ta idi addkami pay laeng iti dennayo, impakpakaunamin a maidadanestayto. Ket kas pagaammoyo, dayta ti napasamak. Daytoy ti gapuna nga imbaonko tapno maammoanna ti sasaaden ti pammatiyo. Madanaganak amangan no sulisogenkayon ti Diablo. No kasta mapasamak, awanen ti serserbi dagiti amin a nagbannoganmi.
Nagsublin ni Timoteo. Impadamagna ti makaparagsak a sasaaden ti pammati ken ayatyo. Nasaona pay a silalagipkayo kadakami ken mailiwkayo a makakita kadakami a kas iti iliwmi met a makakita koma kadakayo. Isut gapuna, kakabsat, dakayo ti nangparegta kadakami iti amin a pannakariribuk ken panagsagabami. Ti pammatiyo ti nangpapigsa kadakami agsipud ta itan, pudno nga agbiagkami no agtalinaedkayo a natibker iti panagbiagyo iti Apo. Mabalinmin ti agyaman iti Dios gapu iti rag-o nga impaayyo kadakami. Aldaw-rabii a sipapasnek ti panagdawatmi iti Dios tapno makitadakayo koma, maan-anaymi ti pagkurangan dagiti pammatiyo.
Sapay koma ta ti mismo a Dios ken Amatayo, ken ni Apotayo a Jesus ti mangiturong iti dalanmi nga umay kadakayo. Padakkelen koma ti Dios ti panagayatyo iti tunggal maysa ken kadagiti amin a tattao, ket dumakkelda koma a kas iti panagayatmi kadakayo. Iti kasta, papigsaennanto dagiti puspusoyo, ket naan-anay ken nasantoankayto iti imatang ti Dios ken Amatayo inton umay ni Apo Jesus agraman dagiti tattaona.
No comments:
Post a Comment