2 Tesalonica 1: 3-12
 |
| [Nabulod ti ladawan a naaramat] |
Ti Panangukom inton Umay ni Cristo
Kakabsat, masapul a kanayon nga agyamanakami iti Dios gapu kadakayo. Tumutop a kastoy ti aramidenmi agsipud ta rumangrang-ay ti pammatiyo ken bumarbara ti panagayatyo iti tunggal maysa. Isut' gapuna a dakami a mismo ti mangipasindayaw kadakayo kadagiti iglesia ti Dios. Pagpannakkelmi ti panagibtur ken panamatiyo iti kangitingitan dagiti pannakaidadanes ken rigrigat a laklak-amenyo.
Daytoy ti pammaneknek iti nainkalintegan ti panangukom ti Dios agsipud ta ti pagbanagan amin dagitoy agdama a sagsagabaenyo, isu ti pannakaikariyo iti Pagarianna. Ngamin, nalinteg ti aramiden ti Dios. Pagsagabaennanto dagiti mangparparigat kadakayo. Pagin-awaennakayto nga agsagsagaba, ket kastanto met ti aramidenna kadakami. Aramidennanto daytoy inton agparang ni Apo Jesus nga aggapu sadi langit. Kaduananto dagiti mannakabalin nga aghelesna agraman ti gumilgil-ayab nga apuy a pangdusa kadagiti di makaammo iti Dios ken dagiti di agtulnog iti Naimbag a Damag maipapan ken ni Apotayo a Jesus. Sagabaendanto ti dusa iti agnanayon a pannakadadael, ket maisinadanto iti sanguanan ti Apo ken iti dayag ti pannakabalinna inton umay iti dayta nga Aldaw tapno awatenna ti pannakaitan-ok nga aggapu kadagiti amin a tattaona. Mairamankayto met a kaduana kadagiti amin a mamati. Mairamankayto met kadakuada agsipud ta pinatiyo ti sao nga impakaammomi kadakayo.
Daytoy ti gapuna a kanayon nga ikarkararagandakayo. Dawatenmi iti Diostayo a pagbalinennakayto koma a maikari iti nangayabanna kadakayo. Sapay koma ta babaen ti pannakabalinna, matungpal amin a tarigagayyo iti kinaimbag ken ti aramidyo iti pammati. Iti kasta, itan-okyonto ti nagan ni Apotayo a Jesus, ket itan-oknakayto met babaen ti parabur ti Diostayo ken ni Apo Jesu-Cristo.
Salmo 90
Salmo 91: 1-16
Pagsasao 26: 1-2
[source: wwwtaraontibiag.blogspot.com]
No comments:
Post a Comment