Filemon 1: 4-22
 |
| [Nabulod ti ladawan a naaramat] |
Ti Ayat ken Pammati ni Filemon
Kabsat a Filemon, diak liwayan ti agyaman iti Diosko ket ibabaetka iti kararagko tunggal agkararagak. Ta madamdamagko ti ayatmo kadagiti amin a tattao ti Dios, kasta met ti pammatim ken ni Apo Jesus. Ikarkararagko a ti panangipaaymo iti pammatim kadagiti sabsabali, agbunga koma iti naun-uneg pay a pannakaawat kadagiti amin a bendision nga adda kadatayo iti panagbiagtayo ken ni Crosto. Pinaragsak ken pinaregtanak ti ayatmo, ingungotek a kabsat. Napapigsa ti puso dagiti amin a tattao ti Dios gapu kenka.
Dawat ni Pablo a maipaay ken ni Onesimo
Kas kabsatmo ken Cristo, mabalinko nga ibilin kenka ti rumbeng nga aramidem. Ngem gapu iti ayat, kaykayatko ti agpasig kenka. Aramidek daytoy, nupay siak, ni Pablo, maysaak nga ambasador ni Cristo Jesus, ken agdama met a balud gapu kenkuana. Agdawatak ngarud kenka gapu ken ni Onesimo nga anakko ken Cristo. Ta kabayatan ti kaaddak iti pagbaludan, nagbalinak a pannakaamana a naespirituan. Awan idi ti serserbi ni Onesimo kenka; ngem ita, makatulongen kadata.
Pagsubliekon kenka ni Onesimo. Ipakuyogko kenkuana daytoy pusok. Kayatko koma ti makipagyan pay kaniak ditoy bayat ti pannakaibaludko gapu iti ebanghelio, tapno isu ti sunom a tumulong kaniak. Nupay kasta, kayatko koma nga aramidem daytoy nga agubbog iti nakemmo. Isut' gapuna a diak aramiden ti ania man no dika umanamong.
Nalabit nga immadayo kenka ni Onesimo iti apagbiit. Ngem agsubli met laeng ket makipagtaengen kenka iti agnanayon. Ket itan, saan laengen a kas tagabu, no di ket nangatngato pay ngem tagabu: Maysan a napateg a kabsat ken Cristo. Napateg unay kaniak, ket ad-adda pay koma ti panangipategmo itan kenkuana a kas tagabu ken kabsat iti Apo.
No ibilangnak met a kaduam, awatem ngarud ti isusubli ni Onesimo kenkas a kas iti panangawatmo koma kaniak. No adda basol wenno utangna kenka, siakto ti singirem. Kitaem, siak a mismo ti agsurat ken agpirma iti daytoy: Siak ni Pablo. Agbayadakto kenka. [Saanen a masapul nga ipalagipko kenka ti utangmo kaniak dayta biagmo]. Isut' gapuna, kabsatko, a patgam kadi daytoy a dawatko, ket ipagpagapum iti Apo. Kas maysa a kabsat ken Cristo, paragsakennak kadi.
Bayat ti panangisuratko iti daytoy, kapkapnekak a patgamto daytoy a dawatko. Kinapudnona, ammok nga aramidemto ti nasursurok pay nga ti dawatko. Ay wen, di la mabalin nga isaganaannak iti kuarto a pagyanak? Mangnamnamaak nga ipangagto ti Dios dagiti karkararagyo amin, ket pasubliennakto kadakayo.
Salmo 101: 1-8
Pagsasao 26: 20
[wwwtaraontibiag.blogspot.com]
No comments:
Post a Comment