Ipaaymo Kaniak [Ta Pudno a Kasapulanka]

[Nabulod ti ladawan a naaramat]


Ti bagi-
Kawaw, nalapsuten iti pigsa
Mailubo kadagiti pannubok.

Ti panunot-
Naturay ti lubong
Di maliklikan
Sangkatukel a sulisog
Pinataudnat' dakes nga aramid
Insawang bibig naalas a balikas.

Ti puso-
Nauyaw ken managdillaw
Awanan asi, saan a manangilala
Saktanna riknat' sabali.

Ngem mannakaawatak
Ken mangilala kadagiti padak
A naiwawa-
Mamakawanka ta Sikat' kamangan
Dagiti mailubo a kararua
Iti dana a talaytayenda,
Di kabaelan a rebbaen
Ti bileg ti asino man
Ta Sika ti Pudno, ti Dana
Ken ti Biag.

Siak?
Anak ken nanumo nga adipenmo
Adu unayen innak pakariribukan
Aniat' maisubalitko a pakaay-ayoam
Kadagitoy ayat nga it-itdem kaniak?

Ah, idawatko nga ipaaymo kaniak
Ta pudno a kasapulanka
Riknaek bara ti arakupmo
Ti naturay a balikasmo
Ti managayat a puso
Dalusam nagtaeng a dakes kaniak
Tapno maipasngay ti ayat. 

Idawatko Kenka
Ita ken iti agnanayon
Ta pudno a Kasapulanka
Iti inaldaw a panagbiag;
Dinak panawan
Wenno baybay-an
Silnagam ti dana
A pagnaak tapno makitak
Ken maaramidkot' pagayatam.





Napili a Daniw Ita a Lawas
IPAAYMO KANIAK [TA PUDNO A KASAPULANKA]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[CR/RRR.01.2oo7.Maui]