Simrekka Kaniak, O Diosko

[Nabulod ti ladawan a naaramat]


O Diosko, ammok, dakkel unayen
Dagiti basolko tapno ipalnaad ida
Ken ti nagkaadu a panagsamsamko
Iti tagikua ti sabali nga awan permiso,
Kaarigkot' panagtedted ti krimmistal a lua
A matnag iti taaw tapno maitipon
Iti padana nga apgad no dakamatek
Dadduma pay a nagkurangak Kenka.


No ipudnok-ikumpesarko ida
Agulimekak iti panagngerngernger
Dagiti dalluyon iti panangbalibaliktadda kaniak
A dumngeg iti sao ti Dios a mamakawan.

Nagbasolak iti linteg
Karurudko dagiti pammilin
Kagura ida ti pusok
Nagsao ti bibigko kontra iti sabali
Nagaramidak kadagiti banag
Nga immoralidad ken inaramidkot'
Pagayatan ti dakes.
Nagbalinak a tarawitwit ken buakaw
Nagaramidak kadagiti bayolente
Nagsaoak kadagiti palso
Namagbagaak iti kinadakes
Nagulbodak, silalagaw ti pannganganko
Nagalsaak, kinagurak ti Dios
Nagari ti kinarebeldek, nakisuppiatak,
Nagbasol, nagtakaw iti pannakaungetko
Ket diak masurotan dana a pagnaak;
Binalusingsing ken tinallikudak dagiti bilbilin--

Ngem simrekka kaniak, O Diosko!





Napili a Daniw Ita a Lawas
SIMREKKA KANIAK, O DIOSKO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[CR/RRR.12.2o12.Maui]