Ti Surat ni Santiago

Ti Surat ni Santiago 1: 1-18

[Nabulod ti ladawan a naaramat]

Kablaaw
Patgek a Kakabsat:
Kablaawankayo amin a tattao ti Dios a naiwaraswaras iti intero a lubong.

Siak ni Santiago nga agserserbi iti Dios ken ni Apo Jesu-Cristo.



Pammati ken Sirib
Kakabsatko, ibilangko a ragsak no aglak-amkayo iti amin a kita ti rigat agsipud ta ammoyo a ti pannakasuot ti pammatiyo, pataudenna ti anusyo nga agibtur. Tapno naan-anaykayo ket awan pakapilawan ken pagkuranganyo, masapul nga agtalinaedkayo iti kinaanusyo nga agibtur.


Ngem no agkurang ti siasinoman kadakayo iti kinasirib, agkararag koma iti Dios ket maikkanto. Ngamin, managparabur ti Dios ken siaayat a mangted iti amin a tao. Ngem no agkararagkayo, nasken a mamatikayo ket dikay agduadua. Ti siasinoman nga agduadua, mayarig iti allon ti taaw a yallaalla ti angin. Aginsisingpet ti kasta a tao, ket pagduaduaanna ti amin nga aramidna. Dina koma ipagarup nga addanto awatenna iti Apo.


Kinapanglaw ken Kinabaknang
Agragsak koma ti nakurapay a kabsat iti panangitan-ok kenkuana ti Dios. Agragsak met koma ti nabaknang iti panangipababa kenkuana ti Dios. Ta pumusayto ti nabaknang kas iti sabong ti atap a mula. No nakangaton ti init, malanet ti mula iti makasinit a darang. Malaylay ti mula, maregreg ti sabongna, ket madadael metten ti pintasna, kasta met ti pannakadadael ti nabaknang bayat ti panangas-asikasona kadagiti aramidna.


Pannakasuot ken Pannakasulisog
Nagasat ti tao a siaanus nga agibtur iti pannakasuotna. Ngamin, no agballigi, awatennanto ti balangat ti biag nga inkari ti Dios kadagiti agayat kenkuana. No masulisog ti tao, dina koma ipagarup a ti Dios ti mangsulisog kenkuana. Ta saan a masulisog ti Dios iti kinadakes ket di met mangsulisog. Ngem masulisog ti tao no yaw-awan ken iturayan ti dakes a tarigagayna; ket inton mainawen ti dakes a tarigagay, maipasngay ti basol. No makadakkelen ti basol, yegna ti patay.


Dikay maallilaw, ay-ayatek a kakabsat. Aggapu sadi langit ti amin a nasayaat ken naan-anay a sagut. Wen, aggapu iti Dios a namarsua kadagiti nailangitan a silaw. Awan kenkuana ti panagbalbaliw wenno panagsipnget babaen ti panagsukat ti turongen. Babaen ti bukodna a pagayatan ken ti sao a kinapudno, inaramidnatayo tapno datayo ti kangrunaan kadagiti amin a parsuana.



Salmo 116: 1-19
Proverbio 27: 23-27
[source: wwwtaraontibiag.blogspot.com]