[Ta] Sika ti Kakaisuna

[Nabulod ti ladawan a naaramat]



Ta Sika ti Kakaisuna,
ti umuna iti tunggal numero;
pondasion iti tunggal pasdek,
misterio ti kinamaymaysa 
a sirib ti linaon ti puso
ta inlimedmo kadagiti tattao
no ania daytoy.

Ta Sika ti Kakaisuna,
maymaysa ta awan asino man
kadagitoy ti umadu ken maikabassit.

Awan mamaay ti kinaawan
wenno kinakurang, ngem
agtalinaedda latta nga adda
iti nalablabes, ta Sika
ti Kakaisuna, a saan ketdi
a kas ti rugi ti panagbilang
tapno maiggaman wenno
mapetpetan ta dagiti numero;
saanda a mabaliwan a gaw-aten,
maabutan wenno danonen.

Ta Sika a saan a sirmata, 
wenno maysa laeng a pigura.
Ta Sika ti Kakaisuna nga adda
iti amin a labes ken linia
a pagpatinggaan ti maysa
a sirkulo wenno kaarngi 
a sukog ti imahinasionko.

Ngarud, bantayak ti bagik 
iti pananggita ti basol ti dilak,
ta Sika ti Kakaisuna, 
ta Sika ti Kangatoan ti amin
a madayaw iti labes ti napaadda:

"Siasino ti mangabak iti kakaisuna nga umuna a numero?"






[TA] SIKA TI KAKAISUNA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[CR/RRR.o7.2o12.maui]