Ti Ebanghelio kas Insurat ni San Mateo

Ti Ebanghelio kas Insurat ni San Mateo
9: 18-38

[Nabulod ti ladawan a naaramat]

Ti Anak ti Agturay ken ti Babai a Nangsagid iti Kagay ni Jesus
[Mar 5: 21-43; Luc 8: 40-56]
Madama a sarsaritaen ni Jesus daytoy kadakuada idi immasideg ti maysa nga agturay a Judio. Nagparintumeng iti sangngoanan ni Jesus sana kinuna, "Kapatpatay ti anakko a balasitang. Umaymo kadi ipatay ta imam kenkuana ken agbiagto."

Iti kasta, timmakeder ni Jesus ket sinurotna ti agturay. Kimmuyog met kenkuana dagiti adalanna.

Adda maysa a babai a sangapulo ket dua a tawenen a napalalo ti panagbulos ti darana. Immasideg iti likudan ni Jesus ket sinagidna ti gayadan ti kagayna. Ta kinunana iti bagina, "No masagidko la koma ti kagayna, umimbagakon."

Timmaliaw ni Jesus ket nakitana ti babai. "Mangnamnamaka, anakko," kinunana. "Pinaimbagnaka ti pammatim."

Iti dayta met la a kanito, immimbagen ti babai.

Idi dumteng ni Jesus iti balay ti agturay, ket nakitana dagiti musiko nga agtokar iti pumpon ken dagiti umarimbangaw a tattao, kinunana, "Rummuarkayo amin! Saan a natay ti ubing-- matmaturog laeng."

Kinatkatawaanda ni Jesus.

Apaman a nakaruar dagiti tattao, simrek ni Jesus iti kuarto a yan ti balasitang. Iniggaman ni Jesus ti ima ket bimmangonen.

Nagdinamag daytoy iti amin a suli dayta a lugar.



Paimbagen ni Jesus ti Dia a Bulsek
Pimmanaw ni Jesus iti dayta a lugar. Idi magmagna, sinurot ti dua a bulsek a lallaki ket impukkawda, "Anak ni David, kaasiannakami!"

Idi nakastreken ni Jesus iti balay, immasideg kenkuana dagiti dua a bulsek. "Patienyo kadi a maaramidko daytoy?" sinaludsodna kadakuada.

"Wen, Apo," insungbatda.

Iti kasta, sinagid ni Jesus dagiti matada sana kinuna, "Maaramid ngarud a kas iti panamatiyo."

Ket naisubli ti panagkitada. Impaganetget ni Jesus kadakuada nga awan pangibagbagaanda iti naaramid. Ngem pimmanawda ket inwarasda ti damag maipapan ken Jesus iti isuamin a suli dayta a lugar.



Paimbagen ni Jesus ti Lalaki nga Umel
Idi pumampanawda, impan dagiti sumagmamano a lallaki ken Jesus ti maysa a lalaki nga umel agsipud ta linuganan ti demonio. Apaman a napaksiat ti demonio nga adda kenkuana, nangrugin nga agsao ket nasdaaw ti tunggal maysa. Kinunada, "Ditay pay nakakita iti kastoy idoty Israel."

Ngem kinuna dagiti Fariseo, "Ti pangulo dagiti demonio ti mangmangted kenkuana iti dayta a pannakabalin a mangpaksiat kadagiti demonio."



Kaasian ni Jesus dagiti Tattao
Sinursor ni Jesus dagiti amin nga ili ken barbario. Nangisuro kadagiti uneg ti sinagogada, inkasabana ti Naimbag a Damag ti Pagarian ken pinaimbagna dagiti tattao kadagiti amin a klase ti sakit ken sagabaen.

Simnek ti kaasi ni Jesus kadagiti tattao idi makitana ida a mabutbuteng ken nakakaasi. Kasda la karnero nga awan mangpastor kadakuada.

"Adu ti anien, ngem bassit ti maani," kinuna ni Jesus kadagiti adalanna. "Agdawatkayo ngarud iti akin-kukua iti maani tapno mangibaon kadagiti agani."




Salmo 11: 1-7
Proverbio 3: 11-12
[source: wwwtaraontibiag.blogspot.com]