 |
| [Nabulod ti ladawan a naaramat] |
Mateo 22: 34-46
Kangrunaan a Bilin
[Mar 12: 28-34; Luc 10: 25-28]
Naguummong dagiti Fariseo idi nadamagda a pinagulimek ni Jesus dagiti Saduceo. Maysa nga abogado a kadua ti nangpadas a mangsuot ken Jesus babaen ti saludsod.
"Maestro," kinunana, "ania ti kangrunaan a bilin iti Linteg?"
"Ayatem ti Apo a Diosmo iti amin a pusom, iti amin a kararuam ken iti amin a panunotmo," insungbat ni Jesus. "Daytoy ti umuna ken kangrunaan a bilin. Ti maikadua a kangrunaan a bilin umasping iti umuna, 'Ayatem ti padam a tao a kas iti bagim.' Dagitoy dua a bilin ti pagbatayan ti entero a Linteg ni Moises ken ti panursuro dagiti profeta."
Saludsod maipapan iti Cristo
[Mar 12: 35-37; Luc 20: 41-44]
Idi naguummong dagiti Fariseo, sinaludsod ni Jesus kadakuada, "Ania ti makunayo maipapan iti Cristo? Ania a kaputotan ti nagtaudanna?"
"Nagtaud iti kaputotan ni David," insungbatda.
Sinaludsod manen ni Jesus, "Apay ngarud a ti Espiritu pinaltiinganna ni David nga awaganna ti Cristo iti 'Apo?' Agsipud ta kinuna ni David,
'Kinuna ti Apo iti Apok:
Agtugawka ditoy makannawanko,
Agingga a maparmekko dagiti kabusormo.'
No 'Apo' ti kuna ni David kenkuana, kasano ngarud ti panagtaud ti Cristo iti kaputotan ni David?"
Awan a pulos ti naisungbatda ken Jesus, ket manipud iti dayta nga aldaw, awanen ti makaitured nga agsaludsod kenkuana.
Babalawen ni Jesus dagiti Fariseo ken Mamaestro iti Linteg
[Mar 12: 38-39; Luc 11: 43, 46; 20: 45-46]
Kinuna ni Jesus kadagiti tattao agraman dagiti adalanna, "Adda kalintegan dagiti mamaestro iti Linteg ken dagiti Fariseo a mangilawlawag iti Linteg ni Moises. Isut' gapuna a tungpalen ken surotentayo amin nga ibagada nga aramidentayo. Nupay kasta, diyo tultuladen dagiti aramidda, ta ida ar-aramiden dagiti isursuroda. Pabaklayanda dagiti tattao iti nadagsen a karga ngem dida met tumulonga nga agawit. Amin nga aramidda, aramidenda tapno makita ida dagiti tattao. Kitaenyo ti kaakaba ti nakaisuratan dagiti paset ti Nasantoan a Surat nga adda kadagiti muging ken takkiagda! Kintaenyo ti kanagayad ti barayuboy dagiti kawesda! Magustoanda dagiti katan-okan a lugar kadagiti fiestaan ken kangrunaan a tugaw kadagiti sinagogada. Magustoanda ti makablaawan iti publiko ken maawagan iti Maestro. Saankayo a paawagan iti 'Maestro' agsipud ta agkakabsatkayo amin ket maymaysa ti 'Maestroyo.' Diyo awagan iti 'Ama' ti siasinoman ditoy daga agsipud ta maymaysa ti Amayo sadi langit. Saankayo met a paawagan iti 'Pangulo" ta ti Cristo laeng ti panguloyo. Ti kangrunaan kadakayo masapul nga isu ti adipenyo. Ti siasinoman a mangitan-ok ti bagina, maipababanto; ngem siasinoman nga agpakumbaba, maitan-okto."
Salmo 27: 7-14
Proverbio 6: 27-35
[source: wwwtaraonbiag.blogspot.com]
No comments:
Post a Comment