Hebreo 5: 1-14
 |
| [Nabulod laeng ti ladawan a naaramat] |
Ni Jesus a Naindaklan a Kangatoan a Padi
Ta mapili ti tunggal kangatoan a padi kadagiti kailianna ket matudingan nga agserbi iti Dios gapu kadakuada, tapno idatagna dagiti sagsagut ken datdaton gapu kadagiti basbasol. Yantangay ta adda met pagkapuyanna, maanusanna dagiti ignorante ken managlabsing. Agsipud ta nakapuy met, masapul a mangipaay kadagiti datdaton, saan laeng a gapu kadagiti basbasol dagiti tattao, no di ket gapu met iti basolna. Awan ti mangisaad iti bagina a kangatoan a padi, no di laeng babaen ti panangdutok ti Dios, a kas met iti pannakadutok ni Aaron.
Kasta met a saan a dinutokan ni Cristo ti bagina a kangatoan a padi. Kinuna ketdi ti Dios kenkuana,
"Sika ti Anakko;
Ita nga aldaw, nagbalinak nga Amam."
Kinunana pay iti sabali a paset,
"Padika nga agnanayon
A kas iti kinapadi ni Melkisedec."
Bayat ti panagbiag ni Jesus ditoy daga, inyikkis ken isangitna ti nagkararag ken nagdawat iti Dios a makaisalakan kenkuana iti patay. Naipangag agsipud ta natulnog ken napakumbaba. Ngem uray pay Anak ti Dios, nasursurona ti agtulnog babaen dagiti sinagabana. Idi naaramid nga awan pagkuranganna, nagbalin a pakaisalakanan nga agnanayon dagiti amin nga agtulnog kenkuana, ket dinutokan ti Dios a kangatoan a padi a kas iti kinapadi ni Melkisedec.
Pammagbaga iti Saan nga Isisina
Adu ti naibagami maipapan iti daytoy a banag, ngem saan nga ilawlawag kadakayo agsipud ta narigatkayo a makaawat. Ta iti daytoy kabayagen ti tiempo, rebbengna ko,a metten a dakayo ti mangisuro. Ngem saan met, ta masapulyo pay laeng ti sabali a mangisuro kadakayo kadagiti umuna a panursuro ti Dios. Imbes koma a taraon ti nataengan ti kanenyo, saan ta gatas pay laeng ti masapul nga inumenyo. Ta ti tao a gatas ti pagbibiagna, ipakitana nga ubing pay laeng ta dina ammo ti maipapan iti naimbag wenno dakes. Ngem ti taraon ti nataengan, agpaay kadagiti nataengan, isuda a nasursruoan a mangaramat kadagiti panunotda a mamaglasin iti naimbag ken dakes.
Salmo 105: 1-15
Proverbio 26: 28
wwwtaraontibiag.blogspot.com
No comments:
Post a Comment