Impariknam kaniak--
ditoy pusok
ti ayat
tapno punuenna
ti naatianan a namnama.
Imbus-oymo ti raya
ti init
a lawaganna dagiti matak
tapno makitak,
maimutektekak
ti pudno
a kaipapanan ti biag
ket dimo impalubos
a sibbarotennak
ti pumaypayapay a sulisog
tapno agkurno
iti aramid a naindagaan
a pakailaw-anak.
Wen, Sika, O Apo,
ti ubbog ti biag
a pagubbogan ken paggapuan
ti amin--
ti biag a pakasarakak
ti pudno a ragsak...
[nabulod ti ladawan a nausar]
No comments:
Post a Comment