[Ta] Sika ti Kakaisuna, ti umuna
Iti tunggal numero; ti pondasion
Tunggal pasdek, Sika ti Kakaisuna,
Awanan mulit ngem misterio
Iti kinamaymaysa--
Ta nailimed daytoy kadagiti tattao.
[Ta] Sika ti Kakaisuna, ti bugbugtong
Ket awan asino man a mamasirib
Ti nakasirip iti daytoy naindaklan
Nga aramidmo. Ti siribmo, siribmo,
Saanto a mayababa wenno mayatiddog.
Awan mamaay ti kinaawan ken kinakurang,
Ngem agtalinaeddanto latta nga adda
Iti nalablabes, ta Sika ti Kakaisuna,
A saan ketdi a rugi ti panagbilang
Tapno maiggaman wenno mapetpetan
Dagiti numero; saanda a mabaliwan
A gaw-aten, maabutan wenno danonen.
[Ta] Sika saan a sirmata, wenno maysa a pigura.
[Ta] Sika ti Kakaisuna nga adda iti amin a labes
Ti linia a pagpatinggaan ti maysa a sirkulo,
Wenno kaarngi a sukog ti imahinasionko.
Ngarud, bantayak ti bagik iti pananggita ti basol
Ti dilak, ta Sika ti Kakaisuna, ta Sika ti Kangatoan
Ti amin a madayaw iti labes ti napaadda:
"Siasino ti makarippuog iti kakaisuna nga umuna a numero?"
.
.
.
.
.
[TA] SIKA TI KAKAISUNA
Rudy Ram. Rumbaoa
wwwtaraontibiag.blogspot.com
[nabulod ti ladawan a nausar]
No comments:
Post a Comment