Ti Dios, Ayat
Umuna a Surat ni San Juan 4
Ti Paggiddiatan ti Pudno ken Ulbod nga Espiritu
Ay-ayatek a gagayyem, diyo patien ti amin nga espiritu no di ket suotenyo no agtaud iti Dios wenno saan. Ta nagwarasen ditoy lubong ti adu a sinan-profeta. Daytoy ti pakaammuanyo ti Espiritu ti Dios. Agtaud iti Dios ti ania nga espiritu a mangbigbig nga immay ni Jesu-Cristo a kas tao. Ngem saan nga agtaud iti Dios ti uray ania nga espiritu a di mangbigbig a nagbalin ni Jesus a tao. Agtaud daytoy iti anticristo a nangnangngegyo nga umayto, ket addan ditoy lubong.
Ngem dakayo, annakko, kukuanakayo ti Dios, ket naparmekyon dagiti sinan-profeta, agsipud ta nabilbileg ti Espiritu nga adda kadakayo ngem ti espritu nga adda kadagiti taga-lubong. Nailubongan dagiti sarsaritaenda, ket dengngen ida ti lubong agsipud ta kukua ida ti lubong. Ngem datayo, kukuanatayo ti Dios. Dumngeg kadatayo ti makaammo ti Dios. Saan a dumngeg dagiti saan a kukua ti Dios. Daytoy ngarud ti pakaammuantayo iti paggiddiatan ti pudno ken ulbod nga espiritu.
Ti Dios, Ayat
Ay-ayatek a gagayyen, agiinnayattayo, agsipud ta ti ayat agtaud iti Dios. Anak ti Dios ti siasinoman nga agayat, ket am-ammona ti Dios. Ti saan nga agayat, saanna nga ammo ti Dios, ta ti Dios, ayat. Kastoy ti panangipakita ti Dios nga ay-ayatennatayo: Imbaonna ditoy lubong ti kakaisuna nga Anakna tapno maaddaantayo iti biag gapu kenkuana. Daytoy ti pudno a kaipapanan ti ayat: Saan a gapu ta inayattayo ti Dios, no di ket inayatnatayo, ta imbaonna ti Anakna a pakapakawanan dagiti basoltayo.
Patpatgek a gagayyem, no kasta ti panagayat ti Dios kadatayo, rebbengna nga agiinnayattayo. Awan pay ti nakakita iti Dios. Ngem no agiinnayattayo, agtaeng ti Dios kadatayo ket naan-anay ti ayatna kadatayo.
Kastoy ti pakaammuantayo nga agtaengtayo iti Dios ket agtaeng met kadatayo. Intedna kadatayo ti Espirituna. Nakita ken paneknekanmi nga imbaonna ti Anakna a Mangisalakan ti lubong. Agtaeng iti Dios ti mangbigbig a ni Jesus Anak ti Dios, ket agtaeng met kenkuana ti Dios. Datayo met laeng ti makaammo ken mamati iti ayatna kadatayo.
Ti Dios, ayat! Agtaeng iti Dios ti agtaeng iti ayat, ket agtaeng met kenkuana ti Dios. Ti panggep ti pannakaan-anay kadatayo ti ayat isu ti ditay panagbuteng inton Aldaw ti Panangukom. Maaddaantayto ti tured agsipud ta ti panagbiagtayo ditoy lubong kas met ken ni Crsito. No adda ayat, awan panagbuteng, ta paksiaten ti naan-anay nga ayat ti amin a panagbuteng. Ngarud, ti panagbuteng, agkurang iti naan-anay nga ayat, agsipud ta agkuykuyog ti buteng ken dusa.
Agayattayo agsipud ta immuna nga inayatnatayo ti Dios. Ulbod ti agkuna nga ay-ayatenna ti Dios ngem guraenna met ti kabsatna. Ta dina mabalin nga ayaten ti Dios a dina makita, no dina ayaten ti kabsatna a makitana. Ngarud, daytoy ti bilin ni Cristo kadatayo: Ti agayat iti Dios, rebbengna met nga ayaten ti kabsatna.
.
.
.
.
.
Salmo 123: 1-4
Proverbio/Pagsasao 29: 2-4
wwwtaraontibiag.blogspot.com
[nabuldo ti ladawan a nausar]
No comments:
Post a Comment