Sika ti paggapuan
ti biag
ti pigsa
ti aramid
ti tiempo
ken amin a darikmat
Impariknam kaniak
ti ayat
ditoy pusok
tapno punuenna
ti naatianan a namnama
Imbus-oymo ti raya
ti init
a lawaganna dagiti matak
tapno makitak,
maimutektekak
ti pudno
a kaipapanan ti biag
ket dimo impalubos
a sibbarotennak
ti pumaypayapay a sulisog
tapno agkurno
iti aramid a naindagaan
a pakailaw-anak.
Wen, Sika, O Apo,
ti ubbog ti biag
a pagubbogan ken paggapuan
ti amin---
ti biag a pakataraonan
ti kararua ken pakasarakak
ti pudno a ragsak...
Kenka ti ayat!
.
.
.
.
.
UBBOG TI BIAG
Rudy Ram. Rumbaoa
wwwtaraontibiag.blogspot.com
[nabulod ti ladawan a nausar]
No comments:
Post a Comment