Nasantoan a Mabasa Ita Nga Aldaw
Naadaw iti Surat ni San Juan 17: 1-26
[nabulod ti ladawan a nausar]
Idawdawatan ni Jesus dagiti Adalanna
Kalpasan ti panangisao ni Jesus iti daytoy, timmangad sadi langit. "Ama," kinunana, "dimtengen ti oras. Itan-okmo itoy Anakmo tapno itan-oknaka met. Ta inikkam ti pannakabalinna nga agturay kadagiti amin a tattao tapno ikkanna met ti biga nga agnanayon dagiti amin nga intedmo kenkuana. Ket daytoy ti biag nga agnanayon. Ti pannakaammo dagiti tattao kenka a kakaisuna a pudno a Dios, ken ti pannakaammoda ken ni Jesu-Cristo nga imbaonmo. Indaydayawka ditoy daga. Lineppasko ti trabaho nga intedmo nga aramidek. Ama, itan-oknak ita iti imatangmo, kas iti panangitan-okmo kaniak idi sakbay a naparsua daytoy lubong.
Impakaammoka kadagiti tattao nga intedmo kaniak ditoy lubong. Kukuam ida, ket intedmo ida kaniak. Tinungpalda ti saom, ket ita, ammodan a naggapu kenka dagiti amin nga intedmo kaniak. Ta intedko kadakuada ti sao nga intedmo kaniak, ket inawatda. Ammoda a pudno a naggapuak kenka ket patienda nga imbaonnak.
Idawdawatak ida. Saanko nga idawdawatan ti lubong no di ket dagiti tattao nga intedmo kaniak, ta kukuam ida. Kukuam amin a kukuak; kukuam met amin a kukuam; ket maidaydayawak kadakuada. Ita umayakon kenka. Awanakon iti lubong, ngem addada iti lubong. Nasantoan nga Ama, aywanam ida babaen ti pannakabalin ti naganmo nga intedmo kaniak tapno agmaymaysada a kas kadata. Bayat ti kaaddak kadakuada, inaywanak ida babaen ti pannakabalin ti naganmo nga intedmo kaniak. Sinalaknibak ida, ket awan ti uray maysa kadakuada a napukaw, malaksid daydi tao a naituding a mapukaw tapno matungpal ti Nasantoan a Surat. Ket ita, umayakon kenka, ngem sawek dagitoy ditoy lubong tapno adda kadakuada ti naan-anay a ragsakko. Intedko kadakuada ti saom ket ginura ida ti lubong ta saanda a taga-lubong a kas met kaniak. Diak dawaten nga ipanawmo ida ditoy lubong, no di ket salaknibam ida iti Managdakdakes. Saanda a taga-lubong a kas met kaniak. Pasantoem ida babaen ti kinapudno. Ti saom isu't pudno. Kas iti panangibaonmo kaniak ditoy lubong, kasta met ti panangibaonko kadakuada iti lubong. Gapu kadakuada, idatonko kenka toy bagik tapno mapasantoda met iti kinapudno.
Saan laeng nga isuda ti idawdawatak, ngem uray pay dagiti mamati met kaniak gapu iti saoda. Idawdawatak nga agmaymaysada amin. Ama, adda koma kadata, a kas iti kaaddam kaniak ken iti kaaddak kenka. Agmaymaysada koma taono patien ti lubong nga imbaonnak. Intedko kadakuada ti dayag nga intedmo kaniak tapno agmaymaysada a kas iti panagmaymaysata. Addaak kadakuada ket addaka kaniak tapno awan pagkurangan ti panagmaymaysada; ket iti kasta, maammuan ti lubong nga imbaonnak ken kasta met nga ay-ayatem ida a kas iti panagayatmo kaniak.
Ama, intedmo ida kaniak, ket kayatko a no sadino man ti yanko, addada met koma sadiay tapno makitada ti dayagko. Wen, ti dayag nga intedmo kaniak, ta inayatnak sakbay a naparsua ti lubong. Nalinteg nga Ama, saannaka nga am-ammo ti lubong, ngem am-ammoka, ket ammoda nga imbaonnak. Impakaammoka kadakuada, ket diak mamingga a mangipakaammo tapno maipaayko kadakuada ti ayat nga impaaymo kaniak ket addaak kadakuada."
.
.
.
.
Salmo 119: 81-96
Proverbio/Pagsasao 16: 6-7
wwwtaraontibiag.blogspot.com
No comments:
Post a Comment