Sika ti Dios dagiti dios, Sika ti Apo dagiti apo,
Agturay iti langit, ti nainlangitan, iti law-ang
Nga agbibiag iti daga. Kadagiti amin a naparsua
Wenno napaadda, isuda ti saksi iti gloria
ti naganmo--- amin a napaadda agtamed Kenka.
Sika ti Dios ti amin a naporma, wenno
Nagtagilanga, isuda dagiti tattaom nga agdaydayaw.
Ket nupay saan a maungaw ti gloriam nga awan gapuna,
Kadagiti agrukbab Kenka, Sika, Siksika ti taklinda
Kukuam ken kukuamto ida ngem kas da la bulsek
A saan a makakita iti naindaklan a pannakabalinmo;
Adda agngatngata dida masurotan umno a dana
Kaaduan kadakuada ti matnag iti bubon ti basol
Ket dagiti dadduma, maallilawda iti gita ti manglimlimo
A balikas. Nupay kasta, agsagabada iti nasaem.
Ngem dagiti tattaom a nagna a sidadalus iti kalsada
Ti makakita a silalawag iti turongenda uray pay
Adda kannigid wenno kannawan a paglikuanda,
Awan dumana ta magtengda ti palasiom, O Apo.
Sika ti Dios ket babaen ti korona a naibalangat iti ulom,
Sikat' pakataraonan ti kararua ti amin a nagtagilanga
Wenno naporma, Sika ti mangyeg iti kappia kadakuada.
Sika ti Dios ket kukuam ti amin a dayaw ken pannakabigbig
Ta amin daytoy ket aramidmo a misterio, ket nupay saan
A padapada ti nagan wenno pannakasukog, maymaysa
Ti turongen ken pagnguddoan: Ti umay agpasag Kenka
Tapno mataraonan ti kararua ken maitan-ok ti naganmo!
.
.
.
.
.
SIKA TI DIOS
Rudy Ram. Rumbaoa
wwwtaraontibiag.blogspot.com
*maui.2o12
#ilokodaniw #taraontikararua #saguttibiag #sika #dios #apo
[nabulod ti ladawan a nausar]
No comments:
Post a Comment