Sika Ti Dios

Napili a Daniw Ita a Lawas

[Nabulod laeng ti ladawan a naaramat iti daniw]

SIKA TI DIOS
ni Rudy Ram. Rumbaoa
[nasurat.nob.3.2012.maui]
 
Sika ti Dios dagiti dios, Sika ti Apo dagiti apo,
Agturay iti langit, ti nainlangitan, iti law-ang
Wenno tangatang ken dagiti ayup ken mula
Nga agbibiag iti daga. Kadagiti amin a naparsua
Wenno napaadda isuda ti saksi ken iti gloria
Ti naganmo, amin a napaadda agtamed Kenka.

Sika ti Dios, ken amin a naporma wenno
Nagtagilanga isuda dagiti tattaom ken agdaydayaw.
Ket nupay saan a maungaw ti gloriam nga awan gapuna,
Kadagiti agrukbab Kenka, Sika, Siksika ti taklinda
Kukuam ket kukuamto ida ngem kasla da la bulsek
A saan a makakita iti naindaklan a pannakabalinmo
Adda agngatangata dida masurotan ti umno a dana
Kaaduan kadakuada ti matnag iti bubon ti basol,
Dagiti dadduma maallilawda iti gita ti manglimlimo
A balikas. Nupay kasta, nagsagabada iti nasaem.

Ngem dagiti tattaom a nagna a sidadalus iti kalsada
Ti makakita a silalawag iti turongenda uray pay
Adda kannigid wenno kannawan a paglikuanda
Awan ti dumana ta magtengda ti palasiom, O Apo.

Sika ti Dios, ket babaen ti korona a naibalangat iti ulom,
Sikat' pakataraonan ti kararua ti amin a nagtagilanga
Wenno naporma ken Sika ti mangyeg iti kappia kadakuada.
Sika ti Dios, ket kukuam ti amin a dayaw ken pannakabigbig
Ta amin daytoy ket aramidmo a misterio, ket nupay saan
A padapada ti nagan wenno pannakasukog, maymaysa
Ti turongen ken pagnguddoan: Ti umay agpasag Kenka
Tapno mataraonan ti kararua ken maitan-ok ti naganmo!

[copyright.11.3.2012.by.rudy.ram.rumbaoa]