Ti Lubong nga Umay

Napili a Daniw Ita a Lawas

[Nabulod laeng ti ladawan a naaramat iti daniw]

Ti Lubong nga Umay
ni Rudy Ram. Rumbaoa
[nasurat.11.25.2012.maui]

O Apo, asino ti makaaramid iti daytoy?
Ta Sika ti makaipasdek ti amin
Babaen iti nagloriaan a trono
Iti lugar nga agtakder ti amin a kararua
Dagiti sasanto, ket sadiay ti pagtaengan
Dagiti nadalus ti kararuana
Sadiay makiddaw ti tampong ti biag.

Ket aguray ditoy dagiti nabannog
Ken aglulusiaw tapno awatenda ti pigsa,
Ngem aginana ditoy dagiti mapaay
A makaawat iti baro a kinakired;
Ta isuda ti annak ti Dios nga aginana-
Adda ditoy ti kinaragsak nga awan
Patinggana wenno limitasionna
Ta daytoy ti lubong nga umay.

Ditoy mayarig a pagpunduan
Ken lugar a pakakitaan kadagiti kararua
No sadino a daytoy ti pagsarmingan
Dagiti agserserbi a babbai, makitada
Ken agrukbabdanto iti Apo.

Iti palasio ti Ari, agindegdanto sadiay
Ket makisangoda iti lamisaan ti Apo
Ken ti nagloriaan a kinasirib ti Dios,
Itednanto kadakuada ti nakain-inaka
A kinalasbang. Daytoy ti paginanaan
Ken tawid ti agaramid iti kinaimbag,
Awanto ti pagpatingaanna, ta kas iti daga
Nga agayus iti gatas ken diro
Ken prutas a mangtaraon iti kararua.

[copyright.by.rudy.ram.rumbaoa]