Panagbalbaliw

Napili a Daniw Ita a Lawas

[Nabulod laeng ti ladawan a naaramat iti daniw]

Panagbalbaliw
ni Rudy Ram. Rumbaoa
[nasurat.12.29.2012.maui]


Kasano nga usarek ti baro a tawen
Tapno agserbiak a naimbag iti Apo?

Basaekto ti Nasantoan a Biblia
Iti inaldaw-aldaw ken makitulagak
Iti nalablabes ngem ekspektaren.
Birokek dagiti baro a wagas
Tapno makapagserbiak iti sabali;
Ayatekto met ti kaarrubak.
Ipamaysakto met ti "mangted"
Imbes nga "agawatak"
Iti gunggonak.
Pakawanekto met dagiti tattao
A kasuron wenno kagurak;
Palubosakto met a pumanaw
Ti managunget a riknak ket padasekto
Nga ayaten dagiti kabusorko. Nupay narigat,
Iti baro a tawen, padasekto nga itag-ay
Dagiti tattao imbes nga ipababak ida.
Punnoekto ti pusok iti ayat ken rag-o,
Ken diakto ikawes manen
Ti kinarupanget a kinatao.
Bugtakekto a pumanaw ti panagdandanag
Wenno panagbutbutengko;
Mamatiak ket italekko ti aminko Kenkuana.
Agbabawiakto ken padasek ti mangikabassit
Iti panagbasolko ken tungpalekto
Ti amin a bilbilin ken pagayatanna.
Narigat ngem aramidekto ti kabaelak
Tapno adda anag ken kaipapanan
Dagitoy a resolusionko iti baro a tawen--
Ta patiek, adda maaramidak iti tunggal
Aglabas dagiti aldaw a dayta ti pakalag-anak.

Ay-ayatekto ti Apo iti amin a pusok,
Iti amin a panunot ken iti amin a kararuak...

[copyright.december.2012.by.RRR]