 |
| [Nabulod ti ladawan a naaramat iti daniw] |
Simrekka Kaniak, O Diosko
ni Rudy Ram. Rumbaoa
[nasurat.12.2.2012.maui]
O Diosko, ammok a dakkel unay
Dagiti basolko tapno ipalnaadko ida
Ken ti nagkaadu a panagsamsamko
Iti tagikua ti sabali nga awan permiso,
Kaarigkot' panagtedted ti krimmistal a lua
A matnag iti taaw tapno maitipon
Iti padana nga apgad no dakamatek pay ti dadduma--
Wen, no ikompesarko ida;
Nupay kasta, agulimekak iti panagngergernger
Dagiti dalluyon ken ti panangbalibaliktadda kaniak:
"Ti dumngeg iti sao ti Dios ken mamakawan."
Nagbasolak iti linteg
Karurodko dagiti pammilin
Kagura ida ti pusok
Ken nagsao ti bibigko kontra iti sabali.
Nagaramidak kadagiti banag nga immoralidad
Ken inaramidkot' pagayatan ti dakes
Nagbalinak a tarawitwit ken buakaw
Nagaramidak kadagiti bayolente
Nagsaoak kadagiti palso
Namagbagaak iti kinadakes
Nagulbodak, silalagaw iti pannanganko
Nagalsaak, kinagurak ti Dios
Nagari ti kinarebeldek, nakisuppiatak, nagbasol
Nagtakaw iti pannakaungetko
Ket diak masurotan dana a pagnaak-
Binalusingsing ken tinallikudak dagiti bilibilin.
"Ngem simrekka kaniak, O Diosko!"
No comments:
Post a Comment