Ikararagam Ida [Maikadua iti Dua a Paset]

Dadduma Pay...

[Nabulod laeng ti ladawan a naaramat]

Ikararagam Ida [Maikadua iti Dua a Paset]
Ni Rudy Ram. Rumbaoa


ii. Ikararagam ida
ITI tuloy ti panagkararag ni Juan, kunana, "kalpasan a naikararagakon ti bagik, adda dagiti banag a kalikagumak nga ikararag maipanggep kadagiti annakko:

"Umuna Apo, ti salun-atda. Ti salun-at maysa a sagut agingga nga adda mamutbuteng wenno adda mangsibarut iti dayta a kasla awan man ti aniamanna. Adda dagiti ubbing a langada ti nasalun-at, idinto dagiti dadduma, addada nga agsagsagaba iti sakit wenno rangkap iti bagi. Ikararagak ida tapno mapapigsa ti bagi ken kararuada. Idi agtawen ni Angkuan iti sangapulo, bimtak ti apendiksna ket nayospital iti sangapulo nga aldaw. Nagwaras ti sabidong iti sibubukel a bagina ket napukawna ti dagsenna. Awan sabali nga inaramidko iti dayta a gundaway no di nagkakarag kenka, Apo.

Idawdawatak met nga ipaaymo kadakuada ti kinatalged. No adda damag iti telebision ket agnerbiosak unay nangruna no maipanggep ti desgrasia iti lugan, wenno damag a panangmolestia ti ama iti anak, kidnappings, pannakalmes, panagpaputok iti paltog ken sabsabali pay a makapasidduker. No mabalin, kanayon nga addaak sadiay [iti situasion] tapno maipaayko ti kinatalged iti anakko. Diak maaramid, ngem ti Dios maaramidna. Ikararag iti panangipaaymo ti kinatalged iti anakko gapu ta ti lubong ket napnoan iti peggad. Wen kenka Apo, ti naindaklan a salaknib.

Ti panagpili. Wen, napno ti biag iti adu a pagpilian- adda nasayaat, adda dakes, adda met nasikap, ken adda maag. Ikararagak dagiti annakko ta pilienda koma ti umno. Ikararagak nga iti kinaganus, awanan ekspiriensa, dagiti presyor ken negatibo nga impluesia ti saan koma nga agbalin a permanente a sugat. Ikararagak kenka Apo nga iturongmo ida iti kinasirib kas maysa nga indibidual tapno tumulong daytoy kadakuada a pilien ti nasayaat.

Iti pannakasulisogda. Ammok Apo a tunggal ubbing ket adda pagkapsutan ken alisto a masulisogda. Mabalin a makisinupiatda iti kinaagum, iti manglimlimo a tao, iti alkohol, iti maipawil a droga, agulbod, natangsit wenno ania man dita. No ania ti pakasulisogan ti ubing ket mabalin a saan a problema ti sabali. Ngem amin dagitoy Apo, ikararagak ida iti ania man a pakisupiatanda, ngem diak agsuko nupay diak agballigi.

Pannakapnek. Wen, Apo, kalikagumak a mapnek dagiti annakko iti ragsak. Aglaplapunusan a ragsak basar iti ania man a sirkumtansia wenno kina-komportable. Ammok ti pannakapnek ket aggapu ken agaun a mismo iti puso ken saan nga ikeddeng babaen iti ania man a naaramid iti maysa nga aldaw wenno kinasayaat ken kinapintas nga impakita ti tao. Agbiag ti pannakapnek iti lugar ti ragsak, kappia ken pannakagun-od.

Ti pammatida. Ubbaw ken naliday wenno mapukaw iti biag ti awanan ti pammati. Idawdawatak ngarud Apo dagiti annakko nga addanto tiempo nga agsarangkayo iti rupanrupa. Idawdawatak a sursuroen dagiti annakko nga isumite ti bagida Kenka ket surpringenda ti pagayatan ni Satanas iti ania man a pangallukoyna ken sirkumtansia.

Kadagiti gagayyemda, idawdawatak met a bayat ti panagdakkel dagiti annakko, dakkel unay ti mabalin nga impluensiada iti ugali, aktibidad, ken panagpili. Nasalun-at ti tarigagay dagiti dadduma a gagayyem, ngem saan dagiti sabali. Sapay ta surotan dagiti annakko ti nasayaat a gagayyem ken maipaayanda iti kinatalged kadagiti dakes nga aramid.

Kuna ti dadduma Apo, "Ti nasayaat nga ugali ket napatpateg nga adayo ngem iti balitok." Ti ugali makipagbiag iti biag ti nasged a tarigagay, integridad, kinaemma, managparabur, kinasayaat, kinaanus, kinatured ken ammona a tenglen ti bagina.

Ti agbalin a kapisi ti puso. Idawdawatak, O Apo, ti salun-at daytoy agbalin a kapisi ti puso ti anakko, ti kinatalgedna, ti panagpili, ti saanna a pannakasulisog, pannakapnek, pammati, dagiti gagayyemna ken ugalina. Ikararag ti anakko a pilienna ti umno a para kenkuana [no maminsan, ibasar dagiti dadduma iti pilienda nga asawaen iti kemistri, ti pisikal a langa wenno sexual attraction ti tao].

Ikararagak met Apo nga ipatawid koma dagiti annakko ti positive values, nasayaat nga ugali ken napigsa a pammati tapno gungunaam ida a mangibati iti napintas a pakasaritaanda saan laeng nga iti daga no di pay idiay langit."

Idi malpas ni Juan ti kararagna, kasla naapsut kenkuana ti maysa a siit iti kaungganna.


[maituloyto...]