Parmeken ti panawen ti kinaliday

Ababa a Salaysay [Nabulod laeng ti ladawan a naaramat iti salaysay] Parmeken ti panawen ti kinaliday ni Rudy Ram. Rumbaoa MABALIN a masaaw pay laeng ti kasayaatan a kita ti taraon no saan nga umisu ti rikna ken panunot a napno iti panagdudukot. Iti napalabasen nga adu a tawen, kastoy ti imbalakad ti Masirib a Mangaskasaba: "Ti naragsak a puso isut' naimbag nga agas." Iti sabali a panangisao, nasalsalun-atto ti maysa a tao a naragsak ti panagkitana kadagiti bambanag a manglawag ti panunotna. Makibulig ti sibubukel a bagina a sumungbat gapu iti ragsak ti panagbiag. Mapabilegto nga agbiag gapu iti naragsak a kapanunotan. Ngem saan a nagsardeng ti Masirib dita. Innayonna dagitoy napnoan kaipapanan a sao: "Ti managdudukot nga espiritu ket magmaganna dagiti tultulang." Ammotayo amin a ti tao a managdudukot ken manmano a naragsak- kanayon latta a kitkitaenna ti sabali a kinataona, "ti kinaliday." Nalaka nga agdudukot ken maup-upay kadagiti amin a makitana. Saan ngarud a nasalun-at a kas tao. Masinga ti pannakarunaw ti kanenna gapu iti rikna nga adda kenkuana. Bumannayat ti panagtaray ti darana. Nalaka nga agpungtot ken makigkigtot. Saan a makaturturog. Managilem ken naatap kadagiti sabali. Mapukaw ti ragsakna nga agbiag. Uray mano a tableta ken agas ti ipaunegna, awantot' maitedda kenkuana a ragsak. Nalabit, masapulna ti maysa a nalaing nga agluto- maysa a tao a makaammo a mangisagana iti taraon a makaawis iti pannangan. Nasken unay daytoy no kayat nga agpaut ken mananam ti ragsak ti biag. Mabalin a magun-od wenno mapukaw ti naragsak a rikna iti pannangan. Mabigbigto daytoy ti maysa a manakem a tao ket agyamanto gapu kadagiti naimbag a bambanag a dumteng iti biagna. Baybay-annanto ti kinamanagdidillawna ta mabigbigna nga awan ti bayad dagiti "kasayaatan a bambanag iti biag." Nasaysayaat daytoy a banag ngem ti agdudukot gapu kadagiti kinarigat ti biag ken sabsabali pay a bambanag a mangted iti pannakariribuk. Gapuna, iti pannakaplano dagiti taraon a lutoenyo, padasen nga isagana ti kasayaatan a makan nga agpaay iti kaamaan/pamiliayo iti saan unay nangina a gatad. Isagana dagiti taraon tapno saanda laeng a magustoan iti tiempo ti pannangan no di pay ket agyamandanto gapu iti panangaramidyo ti rumbeng ken kasayaatan. Isagana ti naragsak nga aglikmut/aglawlaw iti pagtaengan nga awan ti panagsasalisal wenno panangidumduma. Mapnekkayo koma ket pagragsakan ti amin ti adda. Padasenyo a kitaen iti naragsak a bangir ti biag ket pabilgen wenno iburay met koma kadagiti annakyo a mangaramid iti dayta. Iti kasta agbalinto ti tiempo ti pannangan a kanayon a naragsak nga agpaay iti kaamaan/pamilia, ken uray pay kadagiti am-ammo ken kabagianyo. Malagipdakayto dagiti annakyo gapu iti kinaragsak nga inted/impaayyo kadakuada.*