Awan Perpekto a Tao, Naikkantay' Ketdi iti Kabukbukodan nga Akem

Dadduma Pay:

[Nabulod laeng ti ladawan a naaramat iti artikulo]

Awan Perpekto a Tao, Naikkantay' Ketdi iti Kabukbukodan nga Akem
Ni Rudy Ram. Rumbaoa
[immuna a naiposte iti Iluko.com idi 5.27.2007]


Pakauna:

"Basar ti ekspiriensak iti pannakagrado/pannakakomento dagiti masurat," kinuna kaniak ti parasiimko a marabutit, "saan koma a tagidaksen dagiti pada nga agsursurat iti  Iluko.com dagiti i-komento dagiti agbasbasa, no daytoy man ket makapasakit wenno pakaidayawan ti sinuratda tapno ammo ti author ti pagkamtudan, pagkapsutan wenno pagpigsaan ti sinuratna."

Ngamin no dadduma, adda manggrado iti maysa a sinurat a dina met ibuksilan ti rason no apay a grinaduanna iti kasta. Saan a mailawlawag ket di ammo ti nagsurat no ania ti rumbeng nga aramidenna tapno ad-adda pay koma a mapapintas ti sinuratna.

Iti sabali a bangir, adda met sumagmamano nga agbasbasa wenno aginbabasa [puera delos buenos] a manggrado iti nababa ti maysa nga artikulo, wenno agkomento a kas man pangbalsanna [agbalin a personal] dagiti dida kaykayat a masurat [ken dagiti dida kagayyeman- kunak man].

Kuna pay ti parasiimko a marabutit nga inikkanda iti nababa a grado isuna ken nakomentuan iti kasta unay, a no mayarig koma, napagsasaoan iti di malamut ti aso ti sinuratna nga artikulo. Idi damagen ti parasiimko a marabutit no apay a nagraduan iti kasta, naikkat ti komento/panagsaludsodna banag a pagsidsiddaawanna unay.

"Nasayaat kadi ti kasta? Awan sportsmanship-na. Dina kayat ti madillaw idinto a nalaing daytoy a mangdillaw iti aramid ti sabali," inggibusna.

*Pasagid: "Ti agsidat" sili isut' magasangan!"
----------------------

"KAYAT ti maysa a tao ti agbalin a perpekto. Kayatda ti agbalin a kangrunaan iti amin. Kayatda ti agaramid iti kinasayaat, nasaysayaat pay ngem ti ar-aramidenda a kinasayaat. Agaramidda kadagiti nainsiriban a bambanag a di kabaelan nga aramiden ti sabali. Ngem ti kinapudnona, uray magun-odda amin dagitoy, addanto latta pagbiddutan wenno kamali a maaramidda. Dagiti dadduma, ipagarupda nga isuda ti kasisiribanen a parsua iti agdama ta masiripda ti kabassitan a kamali ti padada a parsua. Wenno, dillawenda ti aramid ti sabali idinto a dakdakes met ti aramidda. No saan, adda agipapan nga inaramid ti maysa a tao "dayta," idinto a saan met. Dagiti dadduma, manglimlimoda. Aramatenda pay ti sao ti Dios kas panglingedda ti pudno a kinataoda. Saan kadi a kuna ti Nasantuan a Biblia: "Kasano a makitam ti mukat ti kabsatmo idinto a dimo pay maikkat ti troso kadagita matam?" A, adun ti manglimlimo ket no amirisentayo ti pudno, adudan a nagdasar ditoy lubong.

Kasla pul-oy ti nalamiis nga angin a dumalapus iti bagik dagiti naruay a saludsod a diak pay nasapulan ti sungbatna- wen dagiti apges ken sanaang iti kaunggak. A, kayatko a mayukuyok dagitoy a nagbiddutak iti sidong ti kinalamiis ti rabii, wen, iti sipnget tapno awan makakita kaniak. Kalikagumak a maatur amin ida- dakkel man wenno bassit, iti panunotko, kayatko a mapukawda. No mabalin, awan ti maimarka a nangisit [a pakakitaan ti biddut] iti bukodko a kinatao. Ngem, nakaim-imposible dayta gapu ta maysaak laeng a tao.

IMPOSTOR

Naammuak idi iti sabali a tao [dagiti gagayyemna] ti nagbalin [nga aramid] daytoy mabigbig a Pastor idiay lugarmi- kunat' dadduma, "Impostor." Kinapudnona, nangegko metten a nagsao daytoy iti maysa a radio station iti aglinawas a programana iti maysa a siudad ti Ilocos. Makagutigot ti bosesna [ken panursurona] kadagiti agdengdenngeg iti programa. Naturay no agsao. Tunggal adda isawangna, aramatenna ti Nasantuan a Biblia a pagibasaran kadagiti palawagna. Saan la a dayta, adu ti napasurotna a kimmappeng iti gimongda. Dagiti ubbing, lallakay, babbaket, babbaro ken babbalasang.

Ngem idi agangay, rimmuar ti pudno a maris ti kinataona- ginundawayanna dagiti mapan makigimong kadakuada. Dati, boluntario ti itedmo a tulong para iti pagsayaatan ti gimong. Ngem ginatadanna metten ti ited [tulong] ti tunggal miembrona. Ti kadaksan nga inaramidna, rinamesna ti maysa kadagiti balasang a napan naki-gimong. Nagkayamkam a kasla apuy ti damag iti intero a suli ti siudad agingga a nakadanon iti probinsia, kabangibang a lugar ken iti intero a pagilian. Nakababain nga aramid. Naammuan ti kaaduan ti nangisit a gagemna iti likudan ti kinapudaw ti kagayna. "Camouflage." Ana ngarud, di nakasuan iti "Rape."

*Pasagid: "Dimo aramaten ti Sao ti Dios iti bukodmo a panglakagan!"

NAIKEDDENGEN TI GASATNA

ADDAN ti Inak ken kabsatko a babai iti Hawaii idi mangrugin nga agsalug ti salun-at ti Amak. Iparparipiripna kadakuada a kayatna [ti Amak] ti agawid iti Filipinas ta napia la nga addakam' kada Manang, ni Ading ken Siak a mangkita ken mangtaripato kenkuana. Nayawid ngarud gapu ta dinan kabaelan ti klima iti Hawaii. Imbag ta nakapagretiron iti pagtrabahoanna idi mapasamak daytoy. Mabalin met nga iti edadna ti makagapu no apay nga agsalug ti salun-atna. Wen, iti edadna a walo pulo ket dua...

Diak ketdi malipatan ti kanayon a saludsoden 'di Amak no kaano nga agsimpakami iti kaayan-ayatko. Namrayan laeng nga isungbatko: "Inton malainganka."

Ngem ti kinapudnona, nasakit nga awaten no ammom a saanen nga agbayag iti lubong ti maysa a tao- nangruna no patpatgem daytoy.

"Kayatko pay a makita ti sabali nga apok," dayta man ti kanayonna nga ipaspasangid kaniak. Ngem ania pay, kasta a talaga ti biag. Adda kadi pay maaramidko? No aniat' naikeddengen, isu. Ditay' kabukbukodan ti biag. Binulodtay' laeng iti Apo. Ngem raemek ketdi [ti Amak] ta awan ken saan a namulitan ti nagan ti pamiliami. Sinalluadanna. Naay-ayo ketdi kadagiti appona kada Manang ken Adingko a lalaki- ti inaunaan ken inaudi a kakabsatko.

Kas kunakon, inaramidko amin a kabaelak- no koma laeng mabalin, ilisik isuna iti ngarab ni patay ngem maysaak laeng a tao... ania ti maaramidak? Isut' gasat, dayta ti biag. Naited amin a kasapulanna- ti kaaddami iti sidongna, iti katre a nakaibaludan ti salun-atna. Wen, "comfort measures" a pagsasaoda. No ania ti kayatna a kanen, inumen, aruaten wenno komporme dita- maited amin. Kanayon met a tumawag iti telepono da Ading ken ti Inak nga adda iti Hawaii tapno maited kenkuana dagiti kasapulanna. Ngem para iti Amak, umanayen a ragsakna no mangeganna ti bosesda nga agpadpada.

Ket idi pimmusayen ti amak, ni Manang ken Siak ti adda iti sibayna. Awan ti Adingko a lalaki ta napan gimmatang ti agas iti dayta a kanito a panagbugsot ti Amak. Ngem anian a liday para kenkuana idi madatnganna ti Amak nga awanen ti angesna. Napespes dagiti luana a nagarubos manipud kadagiti matana. Timmayab dagiti agas a ginatangna gapu ta awanen ti serserbina. Kasla agballa ngem ania ngarud ti maaramidna.

Naulimekak laeng a nagdung-aw a nagtugaw iti iking ti katre. Pinalubosak met dagiti naglulumba a luak a nagtedted. Ni Manang ken dagiti annakna, addada iti sabali a suli ti kuarto- agsangsangitda met. Ita, mailadawak no kasano ti kinapateg ti maysa a tao- nangruna no isu ti pundasion ti pamilia. "Kastanto ngata met no siak ti pumusay? Dung-awanak wenno sangitannakto kadi met ti asawak ken ti anakko, wenno dagiti gagayyem ken makaam-ammo kaniak?" Dagitoy ti agay-ayam a saludsod iti panunotko. Wen, diak maliklikan a di panunoten daytoy nupay ammok- "matayakto met a kas iti Amak."

Awan ti naaramidak kadagidi nga aldaw tapno masalbarko pay ti biag daydi Amak. Saanen a maigawid pay ti nakasaganan a gasatna. Uray dagiti agkakalaing a dodoktor, awan ti maaramidanda. Ngem impaayannakami ketdi iti kappia- iti panunotmi a sangkapamilliaan. Pinampanunotko iti nabayag bassit a tiempo, inaramidko met amin a kabaelak...amin a pamuspusan. Ket idi pimmusayen, awan ti pakabasolak- awan ti nagkurangak. Ngem agsansanaang pay laeng ti pusok saan a gapu iti ipupusayna no di ket kadagiti naimbag a naaramidanna iti pamilia. Pudno, maikawakaminto kenkuana gapu kadagiti naimbag a panursurona, ti ayatna, ti kinamakaawat ken ti pammategna- wen, ammo ti Amak nga ay-ayatek ken ipatpategko isuna.

Ita, no adda sangkabassit a kamali wenno biddut, kayatko nga aturen daytoy iti amin a kabaelak. Diak yuray ti sabali a bigat ta diak kayat a mainayon ti problemak ita iti problemak no bigat. Sabali ita, sabali no bigat. Wen, nakaadawak iti leksion iti daytoy a napasamak, "ti dumawat ti pammakawan, ti mangsolbar kadagiti susik ken ti mangipateg ti masakbayan." Nasursurok ti umawag iti kaasi ti Apo.

Ammok a diak mapunasen dagiti nagbalin a kamalik, addada iti panunot, ngem nupay kasta, diak malagipen no adda met kamali a naaramid ti Amak- ketdi, nairamandan a napukaw, naitanemda iti ipupusayna. Nupay awanen iti imatangmi, dayawek isuna nupay saan a perpekto a tao, ngem ketdi- maipagtangsit nga Ama...


*Pasagid: "Agmulaka iti nasayaat a bukel, ta no agbunga ket madanonto ti panagpuros, saan la a sika ti mairanud iti bunga nga intukitmo [a bukel] no di pay dagiti dadduma a tattao nga agkalikagum a makaraman iti "bunga ti kinamanagparaburmo."