Sakbay a Timmaoak

[Nabulod laeng ti ala a ladawan da Sofia Monique ken Adelindes Ramos Rumbaoa]

Sakbay a Timmaoak
[Ken ni Adelindes]
Ni Rudy Ram. Rumbaoa
[nasurat.5.5.2013.maui]
 

Sakbay a timmaoak, naaramidak. Wen siak
A nakabuklan iti ayat ken anus, disiplina ken lua,
Kalpasanna; in-inut a naipasngayak
Tapno mawayawayaannak dita saklolom,

Impalubosmo kaniak nga aglangoyak iti bukodko
A taaw, nupay iti maysa a pedaso ti daga
A kumamang iti danum-taaw, adda panagamakmo.
Wen, ta sakbay ti siak, naaramidak. Siak,

Ken iti amin nga arapaapmo no ania ti pagbanagak
Sinanamaka a mamuliak kadagiti tawen,
Kalpasanna, in-inut a nagpalikud ti panagaksawmo
Tapno makitak ti lawag ken kaipapanan ti biag,

Ket iti in-inut a panangyawatmo ti pagrebbengam
Iti sabali ken ti panangipalubosmo a masukogak
Kadagiti kapatadak, nagpalikud ti panagaksawmo
Tapno nanamek ti itden a ragsak ti kinaagtutubok.

Iti panagbalinmo a naimbag ken nasikap nga ina,
Naragsak ti panagsalam bayat iti yaasideg ti maudi
A nasam-it a kadensia, nagpalikud ti panagaksawmo
Tapno awatek ti tulbek ti responsibilad a kalikagumak;

Ket gapu ta ti ayat, gagangay nga ininspirarannak
Ken natural laeng a makasakduak iti adal: awaten
Ti panunot a kas pudno ti aniaman a pagtamedan
Ti puso- ta babaen iti ayat, nabukelak. Ta siak

Ken iti panagaksawmo nga agpalikud, siakto latta
Ti parupam iti agnanayon; ta Sika iti Siak- maymaysa,
Siakton ti naan-anay a timon ti innak panagwaywayas...


-Dagiti  Koleksion a Daniw, Sarita, Kanta, ken Dadduma Pay
-copyright.by.rudy.ram.rumbaoa.5.2013.maui