Aramid 10:24-48
 |
| [Nabulod ti ladawan a naaramat] |
Ni Pedro ken ni Cornelio
Dimtengda idiay Cesarea iti sumuno nga aldaw. Paspasungaden ida ni Cornelio agraman dagiti inawisna a kakabagian ken nadekket a gagayemna.
Idi sumrek ni Pedro, sinabat ni Cornelio a nagparintumeng ken nagrukbab iti sangngoananna.
Ngem pinatakder ni Pedro ket kinunana, "Tumakderka, ta taoak met a kas kenka!"
Nakisarsarita ni Pedro kenkuana idi sumrekda iti balay. Sadiay, nakitana ti adu a tao a natipontipon. Kinunana kadakuada, "Paggaamoyo nga iparit ti Lintegmi a makilangen wenno sumarungkar ti maysa a Judio iti saan a Judio. Ngem impakita kaniak ti Dios a saanko nga ibilang ti siasinoman a narugit wenno natulawan. Iti kasta, idi naayabanak immayak a situtulok. Damagek ngarud no apay a naayabanak."
Kinuna ni Cornelio, "Tallo nga aldawen ti napalabas. Agkarkararagak idi iti alas tres iti malem. Paggammoan, nagtakder iti sangngoanak ti maysa a lalaki a nagkawes iti makapurar. Kinunana, 'Cornelio, impangag ti Dios ti kararagmo ket malagipna dagiti panaglimlimosmo. Mangibaonka iti mapan idiay Joppe a mangayab ken ni Simon Pedro. Agdagdagus iti igid ti baybay, iti balay ni Simon nga agkurkurte iti lalat.'
"Daytoy ti gapuna a pinaayabanka adagus ket naimbag ta nayan-anusmo ti immay. Ita, addakami iti imatang ti Dios nga agur-uray a dumngeg iti aniaman nga imbaga ti Apo nga ipakaammom."
Agpalawag ni Pedro idiay Balay ni Cornelio
Kalpasanna, nagsao ni Pedro: "Makitakon nga awan tao nga idumduma ti Dios. Awatenna ti siasinoman nga agbuteng kenkuana ken agaramid iti nalinteg, uray ania a nasion ti nagtaudanna. Ammoyo ti sao nga inted ti Dios iti Israel, idi impakaammona ti Naimbag a Damag maipapan iti kappia ken Jesu-Cristo nga Apo ti amin a tao. Ammoyo ti pasamak a nagdidinamag iti amin a Judea, manipud Galiliea kalpasan ti panangikasaba ni Juan iti buniag.
"Ammoyo ti maipapan ken Jesus a taga-Nazaret ken ti panangted ti Dios kenkuana iti Espiritu Santo, pannakabalin. Napan ni Jesus iti amin a lugar a nagar-aramid iti naimbag ken nangpaimbag kadagiti pinarparigat ti Diablo, gapu ta adda kenkuana ti Dios. Dakami ti mangpaneknek iti amin nga inar-aramidna babaen ti panangilansada kenkuana iti krus. Ngem ti maikatlo nga aldaw, nagungar ken nagparang, saan a kadagiti amin a tao no di kadakami laeng a saksi kenkuana kalpasan ti panagungarna. Binilibilinnakami a mangikasaba iti ebanghelio ken mangpaneknek nga isu ti dinutokan ti Dios a mangukom kadagiti nabiag ken natay. Saksian dagiti amin a profeta ti maipapan ken Jesus a ti siasinoman a mamati kenkuana, mapakawan dagiti basbasolna babaen ti pannakabalin ti naganna."
Awaten dagiti Gentil ti Espiritu Santo
Madama pay laeng nga agsasao ni Pedro idi bimmaba ti Espiritu Santo kadagiti amin nga agdengdengngeg iti mensahe. Nasdaaw dagiti mamati a Judio a kinakuyog ni Pedro a naggapu idiay Joppe gapu ta inted met ti Dios ti Espiritu Santo kadagiti Gentil. Ta nangngegda nga agsasaoda kadagit sabali a pagsasao ken itantan-okda ti Dios.
Kinuna ngarud ni Pedro, "Inawat dagitoy a tattao ti Espiritu Santo a kas met iti panangawattayo idi. Adda aya makaiparit iti pannakabuniagda iti danum?"
Iti kasta, imbilinna a mabuniaganda iti nagan ni Jesu-Cristo. Kalpasanna, dinawatda ken Pedro a makipagyan kadakuada iti sumagmamano nga aldaw.
Salmo 134: 1-3
Proverbio 17: 9-11
[wwwtaraontibiag.blogspot.com]
No comments:
Post a Comment