Ti Kinapadi ni Melkisedec
Hebreo 7: 1-17
[Nabulod ti ladawan a naaramat]
Ti Kinapadi ni Melkisedec
Daytoy a Melkisedec, ari idi idiay Salem ken padi ti Dios a Kangatoan. Idi aggapu ni Abraham iti paggugubatan a nangpapatayanna kadagiti ar-ari, sinabat ni Melkisedec ket binendisionanna. Inted ni Abraham kenkuana ti apagkapullo ti amin a sinamsamna. ["Ari ti Kinalinteg," ti kayat a sawen ti nagan a Melkisedec. Managan pay iti "Ari ti Kappia," agsipud ta isu idi ti ari ti Salem]. Saan nga ammo no siasino ti nagannak kenkuana wenno kapuonanna. Saan met nga ammo no kasano ti pannakayanak wenno ipapatayna, no di ket kas iti Anak ti Dios, agtalinaed a padi iti agnanayon.
Makitayo ngarud no kasano ti kinatan-ok ni Melkisedec! Inted kenkuana ni Abraham a patriarka ti apagkapullo ti amin a nasamsamna iti gubat. Imbilin ti Linteg a dagiti papadi a nagtaud iti kaputotan ni Levi ti agawat iti apagkapullo nga aggapu kadagiti tattao ti Israel; kayatna a sawen, awatenda kadagiti kailianda met laeng uray pay no kaputotan met ida ni Abraham. Nupay saan a nagtaud ni Melkisedec iti kaputotan ni Levi, inawatna ti apagkapullo ken ni Abraham ket binendisionanna daytoy a nagtawid kadagiti karkari ti Dios.
Saan a pagduaduaan a natantan-ok ti mangbedision ngem ti mabendisionanan. Iti biang dagiti papadi, dagiti tattao nga agtungpalto iti patay ti umawat iti apaglapullo; ngem iti biang ni Melkisedec, ti saan a matay umawat iti apagkapullo a kas kuna ti Nasantoan a Surat. Mabalin pay a kunaen nga idi nagbayad ni Abraham iti apagkapullo , nagbayad met ni Levi, nupay ti kaputotanna ti umawat kadagiti apagkapullo. Ta saan a nayanak idi ni Levi, no di ket, kas masasao, adda pay laeng iti uneg ti bagi ni Abraham nga amana idi sabaten ni Melkisedec.
Ta inted ti Linteg kadagiti Israelita babaen ti kinapadi dagiti Levita. No magun-od koma ti kinaan-anay babaen ti kinapadi dagiti Levita, saan koma a masapul ti sabali a padi a kas iti kinapadi ni Melkisedec, a saan ket a kas iti kinapadi ni Aaron. No mabaliwan ti kinapadi, masapul met mabaliwan ti linteg. Nagtaud iti sabali a tribu ti Apotayo a masasao a kangatoan a padi, ket awan ti uray maysa a kamkameng iti tribuna a nagserbi iti altar. Ta paggaammo unay a nayanak ti Apotayo iti tribu ni Juda; ket awan ti nasasao ni Moises maipapan iti daytoy a tribu idi nagsao maipapan kadagiti papadi.
Ti Sabali a Padi a kas ken Melkisedec
Nalawlawag pay a makita daytoy iti panagparang ti sabali a padi a kas ken ni Melkisedec. Nagbali a padi babaen iti pannakabalin ti biag nga awan inggana, saan a babaen ti paglintegan ken pagunnurotan ti tao. Ta kuna ti Nasantoan a Surat, "Padika nga agnanayon, a kas iti kinapadi ni Melkisedec."
.
.
.
No comments:
Post a Comment