Ti Babai a Natiliwan a Makikamkamalala

[Nablulod ti ladawan a nausar]

Ti Babai a Natiliwan a Makikamkamalala

San Juan 8: 1-20

NAGAWID dagiti amin a tattao, ngem napan ni Jesus idiay Bantay Olivo. Kabigatanna, nasapa a nagsubli idiay Templo. Inaribungbongan ti adu a tao ket nagtugaw a nangisuro kadakuada.

Inyeg dagiti mamaestro iti Linteg ken dagiti Fariseo ti maysa a babai a natiliwan a makikakaidda iti dina asawa. Pinagtakderda iti sangngoananda amin.

"Maestro,"kinunada ken ni Jesus, "natiliwanmin daytoy a babai a makikakaidda iti dina asawa. Kas mayannurot iti Linteg, imbilin ni

Moises a mapapatay iti kasta a babai iti pannakabato. Ania ti kunam?"

Kinunada daytoy a pangsuot ken Jesus tapno adda panggapuanda a mangidarum kenkuana.

Ngem nagrukob ni Jesus ket pinagsuratna ti ramayna iti daga. Idi ulit-ulitenda ti saludsodda, timmakder ket kinunana kadakuada, "Ti awanan basol kadakayo ti umuna a mangbato kenkuana."

Nagrukob manen a nagsurat iti daga. Ngem idi mangngegda ti kinunana, maysa-maysa pimmanaw. Immuna dagiti nataengan agingga a ni laeng Jesus ti nabati ken ti babai nga agtaktakder pay laeng iti sangngoananna.

Timmakder ni Jesus ket kinunana kenkuana, "Babai, sadino ti yandan? Awan kadi ti nagbati a mangdusa kenka?"

"Awan, Apo," ingsungbatna.

Kinuna ni Jesus, "Uray siak, saanka a dusaen. Inkan, ket saanka nga agbasolen."

Ni Jesus ti Silaw ti Lubong

Nagsao manen ni Jesus kadagiti tattao, "Siak ti silaw ti lubong," kinunana. "Siasino man a sumurot kaniak maaddaan iti silaw ti biag, ket dinto magna iti kasipngetan."

Kinuna dagiti Fariseo kenkuana, "Sika met laeng ti mangsaksi iti bagim. Saan ngarud a nakapappapati ti ibagbagam."

"Uray no paneknekak met laeng ti bagik," insungbat ni Jesus, "pudno ti ibagbagak ta ammok ti naggapuak ken ti papanak. Diyo ammo ti naggapuak ken ti papanak. Mangukomkayo kas mayannurot iti pagalagadan ti tao. Diak mangukom uray siasino. Ngem no kas pagarigan ta mangukomak, umno ti panangukomko, ta saan a siak ti mangukom no di ket kaduak pay ti Ama a nangibaon kaniak. Naisurat iti lintegyo a no agtunos ti pammaneknek ti dua a saksi, maawat a kas pudno ti ibagada. Paneknekak met laeng ti bagik, ket paneknekannak met ti Ama a nangibaon kaniak."

"Sadino ti yan ni Amam?" sinaludsodda.

"Saandak nga am-ammo," insungbat ni Jesus, "ket diyo met am-ammo ni Amak. No am-ammodak koma, am-ammoyo met koma ni Amak."

Insao ni Jesus dagitoy bayat ti panangisursurona idiay Templo, iti asideg ti pagurnongan iti kuarta. Ngem awan ti nangtiliw kenkuana, ta di pay dimteg ti orasna.

.

.

.

.

.

Salmo 110: 1-7

Proverbio/Pagsasao 15: 8-1o

wwwtaraontibiag.blogspot.com