[Nabulod ti ladawan a nausar]
Ti Pammaneknek ni Juan a Mammuniag
Nasantoan a Mabasa Ita nga Aldaw
Agbalin a Tao ti Sao
Sakbay a naparsua ti lubong, addan ti Sao., ket ti Sao adda idi iti Dios, ket no ania ti Dios, kasta met ti Sao. Manipud idi punganay, adda ti Sao iti Dios. Pinarsua ti Dios dagiti isuamin babaen kenkuana; ket awan ti naparsua no di babaen kenkuana.
Adda idi kenkuana ti biag, ket daytoy a biag isu ti silaw dagiti tattao. Agraniag ti silaw iti sipnget, ket di mabalinan ti sipnget nga iddepen.
Imbaon ti Dios ti maysa a tao nga agnagan iti Juan. Immay a mangpaneknek kadagiti tattao maipapan ti silaw tapno mamati dagiti amin a manakangngeg kenkuana. Saan nga isu a mismo ti silaw, ngem immay tapno paneknekanna ti maipapan iti silaw. Daytoy ti pudno a silaw, ti silaw nga umay ditoy lubong, ken mangalawag kadagiti amin a tattao.
Ngarud, adda idin ti Sao ditoy lubong. Pinarsua ti Dios ti lubong babaen kenkuana; nupay kasta, saan a nabigbig ti lubong.
Napan iti ilina, ngem saan nga inawat dagiti kailianna. Ngem kadagiti amin nga immawat ken namati kenkuana, inikkanna ida ti kalintegan nga agbalin nga annak ti Dios kas iti kadawyan a pannakaipasngay ti tao; ta ti Dios a mismo ti Amada.
Nagbalin a tao ti Sao ket nakipagtaeng kadatayo. Nakitami ti dayagna a napnoan iti parabur ken kinapudno. daytoy idi ti dayag nga inawatna kas kakaisuna nga Anak ti Ama.
Pinaneknekan ni Juan ti maipapan kenkuana ket impukkawna: "Isu daytoy ti ibagbagak kadakayo idi kinunak, 'Sumarsaruno kaniak, ngem natantan-ok ngem siak, ta addan sakbay a nayanakak.'"
Iti kinabuslon ti paraburna, inawattayo amin a bendisionna: wen, agsasaruno a bendision ti impaayna kadatayo. Ta inted ti Dios ti Linteg babaen ken Moises; ngem immay ti parabur ken kinapudno babaen ken Jesu-Cristo. Awan pay nakakita iti Dios. Ti laeng Maymaysa, a kas iti Dios ken adda iti Ama; isu ti nangipakaammo kenkuana.
Ti Pammaneknek ni Juan a Mammuniag
[Mat 3: 1-12; Mar 1: 1-8; Luc 3: 1-18]
Daytoy ti pammaneknek ni Juan kadagiti papadi ken Levita nga imbaon dagiti Judio nga adda idiay Jerusalem nga agsaludsod kenkuana, "Siasinoka?"
Saan a naglibak ni Juan. "Saan a siak ti Cristo," impudnona.
"Siasinoka ngarud?" sinaludsodda manen. "Sika kadi ni Elias?"
"Saan a siak," insungbat ni Juan.
"Sika kadi ti Profeta?" kinunada.
"Saan," insungbatna.
"Ibagam ngarud no siasinoka," kinunada. "Masapul nga adda isungbatmi kadagiti nangibaon kadakami. Ania ti masaom maipapan kenka?"
Insungbat ni Juan ti impadto ni profeta Isaias:
"Siak ti timek ti maysa nga agpukpukkaw iti let-ang:
Palintegenyo ti dalan a pagnaan ti Apo!"
Adda sumagmamano a naibaon a naggapu kadagiti Fariseo. Sinaludsodda ken Juan, "No saan a sika ti Cristo, wenno ni Elias, wenno ti Profeta, apay ngarud a mamumbuniagka?"
"Mamuniagak iti danum," insungbat ni Juan, "ngem makipulpulapol kadakayo ti maysa a diyo am-ammo. Sumarsaruno kaniak, ngem diak maikari a mangukas iti kordon ti sapatosna."
Napasamak amin dagitoy idiay Betania, iti ballasiw ti karayan Jordan a pamumbuniagan ni Juan.
.
.
.
.
.
Salmo 101: 1-8
Proverbio/Pagsasao 14: 13-14
wwwtaraontibiag.blogspot.com
No comments:
Post a Comment