[Nabulod ti ladawan a nausar]
Ti Pangngarig maipapan iti Napukaw a Karnero
San Mateo 18: 1-2o
Siasino ti Kangrunaan?
[Mar 9: 33-37; Luc 9: 46-48
Iti dayta a kanito, immasideg dagiti adalan ken ni Jesus ket sinaludsodda, "Siasino ti kangrunaan iti Pagarian ti langit?"
Nangayab ni Jesus iti ubing ket pinagtakderna iti sangngoananda. Kinunana, "Laglagipenyo a dikayto makastrek iti Pagarian ti langit no dikay agbalbaliw ken agbalin a kas kadagiti ubbing. Siasinoman nga agpakumbaba ken agbalin a kas iti daytoy nga ubing, isu ti kangrunaan iti Pagarian ti langit. Ket ti siasinoman nga umawat iti maysa kadagiti kakastoy nga ubing gapu kaniak, siak ti awatenna."
Dagiti Pakaigapuan ti Panagbasol
[Mar 9: 42-48; Luc 17: 1-2]
"No adda siasinoman a pakaigapuan ti panagbasol ti maysa kadagitoy nga ubbing a mamati kaniak, nasaysayaat koma a maigalut ti dakkel a gilingan a bato iti tengnged dayta a tao sa mailemmes iti taaw. Asi pay ti lubong gapu iti kaadu dagiti pakasulisogan dagiti tattao! Umay a di bumurong dagitoy a sulisog, ngem asi pay ti tao a pakaigapuanda!
No ta imam wenno sakam ti pakaigapuan ti panagbasolmo, putdem ken ibellengmo! Nasaysayaat a pawad wenno pukolka a sumrek iti biag nga agnanayon ngemti addaanka iti dua nga ima ken dua a saka ket maitappuakka iti agnanayon nga apuy. No ta matam ti pakaigapuan ti panagbasolmo, suatem ket ibellengmo! Nasaysayaat a buldingka a sumrek iti biag nga agnanayon ngem ti addaanka iti dua a mata ket maitappuakka iti apuy idiay impierno."
Ti Pangngarig maipapan iti Napukaw a Karnero
[Luc 15: 3-7]
"Kitaenyo ta diyo laisen ti uray maysa kadagitoy nga ubbing. Ta ibagak kadakayo nga idiay langit, kankanayon a kitkitaen dagiti anghelesda ni Amak nga adda sadi langit [Ta immay ti Anak ti Tao tapno isalakanna ti napukaw.]
Ania ti makunayo? Ania ti aramiden ti maysa a tao nga addaan iti sangagasut a karnero no mapukawna ti maysa kadakuada? Panawanna dagiti siam a pulo ket siam iti turod ken mapanna sapulen ti napukaw a karnero. Ibagak kadakayo a no masapulanna, ad-addanto ti ragsakna iti daytoy a karnero ngem dagiti siam a pulo ket siam a saan a napukaw. Kasta met a di kayat ni Amayo sadi langit a mapukaw ti uray maysa kadagitoy nga ubbing."
Ti Kabsat a Makabasol
"No makabasol kenka ti kabsatmo, inka kenkuana ket ibagam ti basolna. Ngem aramidem daytoy no duduakayo. No dumngeg kenka, napasublimon ti kabsatmo. Ngem no dinaka ikaskaso, mangikuyogka iti maysa wenno dua a kaduam tapno kas nailanad iti Nasantoan a Surat, 'mapatalgedan ti amin a pammabasol babaen ti pammaneknek ti dua wenno tallo a saksi. Ngem no dina denggen ida, ipakaammom iti iglesia. Ket no dina latta denggen ti iglesia, ibilangmon dayta a kabsat a kas maysa a gangannaet wenno agsingsingir iti buis."
Panangiparit ken Panangipalubos
"Ibagak ngarud kadakayo: Ti aniaman nga iparityo ditoy daga, maiparitto met idiay langit; ket ti aniaman nga ipalubosyo ditoy daga, maipalubosto met idiay langit.
Adda pay ibagak kadakayo: No pagnummoan ti dua kadakayo ditoy daga ti aniaman a dawatenyo, itedto kadakayo ti Amak sadi langit. Ta no sadino ti yan ti dua nga agguummong gapu iti naganko, addaak kadakuada sadiay."
.
.
.
.
.
Salmo 22: 19-31
Proverbio/Pagsasao 5: 15-21
wwwtaraontibiag.blogspot.com
No comments:
Post a Comment