Agparang ni Jesus ken ni Maria Magdalena

AGPARANG NI JESUS KEN NI MARIA MAGDALENA

Paskua ti Panagungar

Mateo 28: 9-1o; Marcos 16: 19-11

Ti Panagungar ni Jesus

Mat. 28: 1-8, Mar 16: 1-8; Luc 24: 1-12

NASIPNGET pay laeng iti agsapa ti umuna nga aldaw ti lawas idi mapan ni Maria Magdalena iti tanem. Idi nakitana a naikkaten daydi bato a naiserra iti tanem, nagtaray a napan iti yan ni Simon Pedro ken ti sabali nga adalan, daydi dinungdungngo no Jesus. Kinunana kadakuada, "Inikkatda ti Apo iti tanem ket saanmi nga ammo ti nangikabilanda kenkuana."

Napan ni Pedro ken ti nasao nga adalan iti tanem. Nagtarayda a dua ket inunaanna ni Pedro a dimmanon iti tanem. Simmirip iti tanem, ket nakitana daydi lupot a linen, ngem saan a simrek iti tanem. Simmaruno a simmangpet ni Simon Pedro ket naglayon a simrek iti tanem. Nakitana ti lupot a linen a nayaplag sadiay, ken ti lupot a naibedbed iti ulo ni Jesus, ngem saan a nailaok iti yan ti lupot a linen, no di ket nalukot a nailasin iti sabali a disso. Simrek met ti adalan, daydi immun-una a nakadanon iti tanem. Nakitana ti napasamak ket namati. [Dida pay la maawatan ti kuna ti Nasantoan a Surat a masapul nga agungar ni Jesus.]

Kalpasanna, nagawid dagiti adalan.

Agparang ni Jesus ken ni Maria Magdalena

Mat 28: 9-1o; Mar 16: 9-11

NAGBATI ni Maria nga agsangsangit iti ruar ti tanem. Idi madama nga agsangsangit, nagdumog a kimmita iti uneg ti tanem, ket nakitana ti dua nga anghel a nakapuraw nga agtugtugaw iti disso a nakaikabilan ti bangkay ni Jesus. Adda ti maysa iti uloananna ket ti sabali iti sakaanan.

"Babai," sinaludsod ni Jesus, "apay nga agsangsangitka?"

"Impanawda ti Apok, ket diak ammo ti nangikabilanda kenkuana!" insungbatna.

Idi nasaonan daytoy, timmaliaw ket nakitana ni Jesus nga agtaktakder sadiay, ngem dina nalasin.

"Babai," sinaludsod ni Jesus, "apay nga agsangsangitka? Siasino ti sapsapulem?"

Impagarup ni Maria nga isu ti hardinero, ket kinunana kenkuana, "Apo, no sika ti nangipanaw kenkuanan, ibagam man ti nangikabilam ta innak alaen."

"Maria!" kinuna ni Jesus.

Simmango ni Maria ket kinunana kenkuana iti Hebreo, "Rabboni!" [Kayatna a sawen, Maestro].

"Dinak iggaman, ta diak pay nagsubli ken Ama," kinuna ni Jesus. "Ngem inka ibaga kadagiti kakabsatko nga agsubliakto iti Amak nga Amayo met, iti Diosko a Diosyo met."

Napan impadamag ni Maria Magdalena kadagiti adalan anakitana ti Apo. Inbagana pay ti insao ti Apo kenkuana.

Basaen pay Ita a Paskua ti Panagungar

Deuteronomy 33

Luc 13: 1-21

Agbabawikayo wenno Mapukawkayo

IDI dayta a tiempo, adda sumagmamano a tattao sadiay a nangibaga ken Jesus iti maipapan kadagiti taga-Galilea a pinapatay ni Pilato idi madama nga agidatdaton iti Dios.

Kinuna ni Jesus kadakuada, "Ipagarupyo kadi a dakdakkel ti basol dagitoy ngem dagiti dadduma a taga-Galilea, gapu iti kasta a pannakapapatayda?" Saan! Ibagak kadakayo a no saankayo nga agbabawi kadagiti basbasolyo, mataykayto amin a kas kadakuada.

Ket ania met ti panangipagarupyo kadagiti sangapulo ket walo a natay a nagaburan idi marba ti torre idiay Siloe? Ipagarupyo kadi a dakdakes dagitoy ngem dagiti amin a tao nga agnaed idiay Jerusalem? Saan! Ibagak kadakayo a no saankayo nga agbabawika kadagiti basbasolyo, mataykayto amin a kas kadakuada."

Ti Pangngarig maipapan iti Igos a di Agbunga

KALPASANNA, sinarita ni Jesus daytoy a pangngarig kadakuada. "Nagmula ti maysa a tao iti igos iti kaubasanna. Napanna kinita no adda bungana ngem awan nasarakanna. Kinunana ngarud iti pagay-aywanenna: 'Kitaem, tallo a tawenen nga um-umayak ditoy nga agbirok iti bunga daytoy nga igos, ket awan pay nasarakak. Pukanemon! Apay nga ibusenna ti kinataba ti daga?' Ngem insungbat ti agay-aywan: 'Apo, bay-am pay, uray ita la a tawenen. Kaliakto ti lawlawna sakonto abunoan. No agbunganton umay a tawen, nasayaat; no saan, papukanmonton.'"

Paimbagen ni Jesus ti Kubbo a Babai iti Aldaw ti Panaginana

ITI maysa nga Aldaw ti Panaginana, mangisursuro ni Jesus iti maysa a sinagoga. Adda maysa a babai sadiay a sangapulo ket walo a tawenen a linuganan ti dakes nga espiritu. Nagbalin a kubbo ket pulos a di makatakder iti nalinteg. Idi makita ni Jesus ti babai, inayabanna

"Naimbagankan iti sakitmo!" kinuna ni jesus kenkuana. Impatay ni Jesus dagiti imana; dagus a nagtakder ti babai a sililinteg ket nagdaydayaw iti Dios.

Nakapungtot ti agturay iti sinagoga, gapu ta nangagas ni Jesus iti Aldaw ti Panaginana ket kinunana kadagiti tattao, "Innem nga aldaw ti panagtrabahotayo. Kadagita nga aldaw, umaykayo agpaagas, a saan ketdi nga iti Aldaw ti Panaginana!"

Ngem simmungbat ti Apo kenkuana, "Dakayo nga aginsisingpet! Iti Aldaw ti Panaginana, diyo aya warwaran ti baka wenno asnoyo tapno inkay ipainum ida? Sangapulo ket walo a tawenen a pinarigat ni Satanas daytoy nga anak ni Abraham. Saan aya a rumbeng nga ita nga Aldaw ti Panaginana, maruk-atan ti pannakabaludna?"

Nabainan amin a kabusor ni Jesus gapu iti insungbatna. Ngem nagragsak dagiti tattao gapu kadagiti nakakaskasdaaw nga inaramidna.

Ti Pangngarig maipapan iti Bukel ti Mostasa

Mat 13: 31-32; Mar 4: 3o-32

"ANIA ti kayarigan ti Pagarian ti Dios?" sinaludsod ni Jesus. "Ania ti mabalinko a pangipadaan? Mayarig iti bukel ti mostasa nga immula ti maysa a tao iti minuyongan. Nagtubo ket nagbalin a kayo, ket nagumokan dagiti tumatayab dagiti sangana."

Ti Pangngarig maipapan iti Lebadura

Mat 13: 33

KINUNA manen ni Jesus, "Ania ti pangayarigak iti Pagarian ti Dios? Kasla lebadura nga alaen ti maysa a babai ket iagamayna iti tallo a kasukat nga arina. Gapu iti lebadura, bumsog ti intero a masa."

.

.

.

.

.

Salmo 78: 65-72

Proverbio/Pagsasao 12: 25

wwwtaraontibiag.blogspot.com