Kasano

Kasano a pagsardengen panagpitik ti puso?

Kasano ti agbaniaga iti napalabas?

Kasano a libasan ti agdudungsa a rikna?

Kasano a marikna ti kaadda iti panawen?

Kasano a ruk-atan ti tiempo?

Kasano a marikna ti kaadda iti minuyongan ti panawen?

Kaniak--

Ti agekko ti mamagsardeng iti panagpitik ti oras

Agbasaak tapno agbaniagaak iti napalabas

Malibasak ti agdudungsa a rikna iti panangdengngegko ti musika

Agsuratak tapno mariknak ti kaaddak iti panawen

Ti angesko ti mangruk-at ken mamagsilpo iti tiempo

Kuerdasak ti puso ken kararua para iti amin a nadiosan nga akmek 

Tapno marikna ti kaimudingak a kaaddak iti minuyongan ti panawen.

.

.

.

.

.

KASANO

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #kasano #taraontibiag #taraontikararua #rudyramrumbaoa

Asino ti Mangipalnaad iti Kinatan-okna?

Asino ti mangipalnaad iti kinatan-okna?

Ta Isu pinalikawkawanna ti globo ti apuy

Babaen ti di magaraw wenno di magungon

Nga espera, no sadino ti bulan, ti lawag

Ken makasisirap a kinangayed ti init;

Ti beinte nga aldaw a pannakagun-od

Ti panagwerretna. Kalpasanna, agsubli

A makiurnos kadagiti nainlangitan

Ken di mailawlawag a bambanag iti law-ang.

Maiparang ti dadduma a sikretona, ngem

Agtalinaed a di maipalnaad dagiti dadduma.

Ket ti bagina maisaad a kas bagi ti lubong

Maymaysa ti tallopulo ket siam a paset,

Ket binulanbulan a batiren ken kiwarenna---

Ket maikkan iti gundaway dagiti nasayaat

Wenno dakes ti panagemna nga agaramid

Iti kaykayatda. Ngem segut ti pagayatan

Ti Namarsua: "Maipaduyakyak iti amin

A nagtagilanga wenno kadagiti ayup,

Wenno ti amin nga agbibiag iti lubong

Ti kinasirib ken awan pumada a tan-okna!"

.

.

.

.

.

ASINO TI MANGIPALNAAD ITI KINATAN-OKNA?

Rudy Ram. Rumbaoa

wwwtaraontibiag.blogspot.com

#ilokodaniw #itangaaldaw #mangipalnaad #tanokna #taraontibiag #taraontikararua #rudyramrumbaoa

 

Tulongannak

Tulongannak a dumngeg

tapno dumakkelak a nasikap.

Tulongannak a mangammo

ti naimbag ken dakes

ket magnaak iti kalsada a diretso.

Tulongannak a mangikabassit

kinaawan serserbik

ket agbalinak a managpakumbaba.

Tulongannak nga ibaba ti pungtotko

tapno basbassit ti bumusor kaniak.

Tulongannak nga agbalin

a naasi ket agbalin

a mannakipagrikna 'toy pusok.

Tulongannak nga agbalin

a natured tapno diak

agbalin a managbutbuteng.

Tulongannak a mamakawan

tapno awan gura

wenno apal nga im-impenek.

Tulongannak nga agsursuro

nga agtalek tapno ti bagik

diak kasapulan a tenglen.

Tulongannak tapno saanak

a mangukom

ket agayatak a siwawaya.

Tulongannak nga agbiag

iti agdama

tapno saanak nga agtaeng ti napalabas.

Tulongannak a mangbirok ti pammati

tapno saanakton nga agmaymaysa...

.

.

.

.

.

TULONGANNAK

Rudy Ram. Rumbaoa

wwwtaraontibiag.blogspot.com

#tulongannak #ilokodaniw #taraontibiag #taraontikararua #rudyramrumbaoa

TI BARO A LUBONG NGA UMAY

O Apo, asino ti makaaramid iti daytoy?

Ta Sika ti makaipasdek iti amin

Babaen ti nagloriaan a trono

Iti lugar nga agtakder ti amin a kararua

Dagiti sasanto ket sadiay ti pagtaengan

Dagiti nadalus ti panagpuspusona,

Sadiay makiddaw ti tampong ti biag.

Aguray ditoy dagiti nabannog

Ken aglulusiaw tapno awatenda ti pigsa,

Ngem aginana ditoy dagiti mapaay

Tapno awatenda ti baro a kired;

Ta isuda ti annak ti Dios nga aginana--

Adda ti kinaragsak nga awan

Patingga ken pagnguddoanna

Ta daytoy ti baro a lubong nga umay.

Ditoy mayarig a pagpundoan

Ken lugar a pakakitaan kadagiti kararua

No sadino daytoy ti pagsarmingan

Ti Apo a mangukom segun iti inaramid

Tunggal maysa ket dagiti agserbi

A lallaki ken babbai, makitada,

Agdaydayaw ken agrukbabda iti Apo.

Iti palasio ti Ari, agindegda sadiay

Ket makisangoda iti lamisaan ti Apo

Ken ti nagloriaan a kinasirib ti Dios.

Itedna kadakuada ti nakain-inaka

A kinataer ken kinalasbang a pisikal

A langa. Ditoy ti paginanaan

A matawid dagiti agaramid iti kinaimbag,

Awan pagpatinggaanna ta kukuada

Ti maited a gunguna nga agyus

A kas gatas ken diro,

Prutas a mangtaraon iti kararua...

.

.

.

.

.

TI BARO A LUBONG NGA UMAY

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #tibaroalubongngaumay #taraontibiag #taraontikararua #rudyramrumbaoa

[Nabulod ti ladawan a nausar]

Ita Nga Aldaw

KAS met la iti libro ti biag:

Tunggal aldaw maikupin

Ti sabali a panid.

Tunggal bulan mabasa

Ti baro a kapitolo,

Tunggal maudi nga aldaw ti tawen

Agngudo ken mairugi ti baro a serye...

.

.

.

.

.

ITA NGA ALDAW

Rudy Ram. Rumbaoa

wwwtaraontibiag.blogspot.com

#itangaaldaw #taraontibiag #taraontikararua #ilokodaniw #libro #biag #maikupin #sabali #panid #kapitolo #agngudo #mairugi #baro #serye #rudyramrumbaoa

[Nabulod ti ladawan a nausar]

Ita Nga Aldaw

SAAN nga ikkaten ti Dios

ti aniaman a banag

nga addan kenka no di ketdi

suktanna iti nasaysayaat...

.

.

.

.

.

ITA NGA ALDAW

Rudy Ram. Rumbaoa

wwwtaraontibiag.blogspot.com

#itangaaldaw #taraontibiag #taraontikararua #ilokodaniw #rudyramrumbaoa

[Nabukod ti ladawan a nausar]

Panagyaman

Kenka napalabas, 

Agyamanak iti inbatim kaniak

Nga adal, leksion ken sursuro;

Kenka masakbayan,

Nakasaganaak iti isasangbaymo;

Kenka Diosko,

Agyamanak manen iti panangtedmo

Ti sabali a gundaway nga agbiag iti lubong!

.

.

.

.

.

Panagyaman

Rudy Ram. Rumbaoa

Dom. o7 Hun. 2o26

Wai, Maui

wwwtaraontibiag.blogspot.com

#itangaaldaw #ilokodaniw #panagyaman #taraontibiag #taraontikararua #rudyramrumbaoa

[Nabulod ti ladawan a nausar]

Mamati

Amin talipupusen

Agragut tarigagay

Balabala ti tagainep

Ti nauneg a kalikaguman

Mamati iti kabaelan

Nupay adda pagbiddutan

Mangted maregmeg nga adda

Dika mangnamnama ti gunguna

Dana ti balligi adu't tubeng

No maminsan mabayag gun-oden

Adu dagiti pakasuotan

Ngem agresulta adda pagbanagan

Iggaman ti di makita nga arapaap

No nasken punoen ti kasapulan

Tapno dayta a banag inka matagikua

No la ket ti pammati adda kenka.

.

.

.

.

.

MAMATI

Rudy Ram. Rumbaoa

wwwtaraontibiag.blogspot.com

#itangaaldaw #mamati #taraontibiag #taraontikararua #ilokodaniw #talipupusen #tarigagay #balabala #gunguna #balligi #pakasuotan #iggaman #arapaap #matagikua #rudyramrumbaoa

[Nabulod ti ladawan a nausar]

 

Ita Nga Aldaw

Panangpalubos iti napalabas

Ti umuna nga addang

Tapno magun-od

Ti ragsak iti masakbayan...

.

.

.

.

.

ITA NGA ALDAW

Rudy Ram. Rumbaoa

Sab. 3o Mayo 2o26

Wai, Maui

wwwtaraontibiag.blogspot.com

#itangaaldaw #ilokodaniw #panangpalubos #napalabas #umuna #addang #magunod #ragsak #masakbayan #taraontibiag #taraontikararua #rudyramrumbaoa

[Nabulod ti ladawan a nausar]

Ikkannak

Ikkannak iti nasalun-at

A panagpanunot, Apo,

Tapno naimbag ken nadalus 

Ti makitak a saan nga agayat

Iti dakes; agpakumbaba---

Makipagragsak.

Ikkannak iti panunot

A saan a maumat' nalaka,

A saan a nalaka nga umasug

Ken agdukot; dinak palubosan

Nga agdanag iti nalabes

Maipapan ti masansan

A panagbukbukod.

Ikkam met pannakaawat, Apo,

Dagiti tao a mangawat kapadasak

Ket didak ukomen iti biddut

Ti di nagay-ayatan nga aramid

Tapno magun-odko met

Ti sangkabassit a ragsak

A mangrikna dagiti angaw ti biag!

.

.

.

.

.

IKKANNAK

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #ikkannak #nasalunat #agpakumbaba #ragsak #umasug #agdukot #ukomen #biddut #magunod #mangrikna #angaw #biag #taraontibiag #taraontikararua #rudyramrumbaoa

[Nabulod ti ladawan a nausar]

Ita Nga Aldaw

AYATEM dagiti kabusormo,

Bendisionam dagiti mangilunod kenka,

Agaramid iti kinaimbag kadagiti manggurgura kenka

Ken ikararagam dagiti mangabuso kenka...

.

.

.

.

.

Ita Nga Aldaw

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #ayatem #kabusor #bendision #mangilunod #kinaimbag #manggurgura #ikararagam #mangabuso #taraontibiag #rudyramrumbaoa

[Nabulod ti ladawan a nausar]

Ita Nga Aldaw

MAMATIAK a saan nga alisto

A mapukaw ken agmawmaw

Ti panagrrikna ken sensasion

Gapu ta kanayonda

A mataraonan iti rekuerdo...

.

.

.

.

.

Ita Nga Aldaw

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #mamati #mapukaw #agmawmaw #rikna #sensasion #taraon #rekuerdo #taraontibiag #rudyramrumbaoa

[Nabulod ti ladawan a nausar]

Ita Nga Aldaw

MANGRUGI iti umuna

Nga addang ti agbaniaga

Iti rinibu a milia...

.

.

.

.

.

Ita Nga Aldaw

Rudy Ram. Rumbaoa

wwwtaraontibiag.blogspot.com

#itangaaldaw #ilokodaniw #mangrugi #umuna #addang #rinibu #agbaniaga #taraontibiag #taraontikararua #rudyramrumbaoa

[Nabulod ti ladawan a nausar]

Agyamanak

Agyamanak ti kanayon a kaaddam

iti tiempo ti rigat wenno nam-ay,

Addaka latta a nakasagana

Agyamanak met iti patinayon

a pannakaawatmo kadagiti parikutko

a kayatko nga ikamang Kenka

Impariknam kaniak ti pudno

nga ayat ken pammateg no tiempo

iti pannakasuotko, no awanka

a pigsak, mariknak kinalupoyko

Akuek, narigat nga ilawlawag

no kasanot' kinapategmo kaniak;

ngem agyamanak Kenka, Gayyemko,

iti ayat nga it-itdem kaniak.

.

.

.

.

.

Agyamanak

Rudy Ram. Rumbaoa

wwwtaraontibiag.blogspot.com

#agyamanak #itangaaldaw #rigat #namay #pannakaawat #parikut #impariknam #ayat #pammateg #pannakasuot #kinalupoy #taraontibiag #ilokodaniw #rudyramrumbaoa

[Nabulod ti ladawan a nausar]

Haiku 1o

Umuna nga aldaw ti lawas

Nakarimrimat iti aglawlaw--

Naparmeken ni Patay!

.

.

.

.

.

HAI. 1o

Rudy Ram. Rumbaoa

wwwtaraontibiag.blogspot.com

#ilokodaniw #haiku #alleluia #umunangaaldaw #nakarimrimat #naparmeken #patay #taraontibiag #taraontikararua #rudyramrumbaoa

[Nabulod ti ladawan a nausar]

Haiku o8

Sinubbotmo ti basolko

Naitanemka a kaduanak;

Nagungarka, nakipagbiagak!

.

.

.

.

.

HAI. o8

Rudy Ram. Rumbaoa

wwwtaraontibiag.blogspot.com

#ilokodaniw #haiku #gaputayat #sinubbotmo #basolko #naitanem #nagungarka #nakipagbiagak #taraontibiag #taraontikararua #rudyramrumbaoa

[Nabulod ti ladawan a nausar]

Haiku o7

Sikat' silawko iti kasipngetan

Diakto pulos mayaw-awan

Sikat' mangidalan pagnaak...

.

.

.

.

.

HAI. o7

Rudy Ram. Rumbaoa

wwwtaraontibiag.blogspot.com

#ilokodaniw #haiku #sika #silaw #kasipngetan #mangidalan #pagnaak #taraontibiag #taraontikararua #rudyramrumbaoa

[Nabulod ti ladawan a nausar]

Haiku o9

Narasiak, ammok maawatannak

Sikat' kamangko no umay riribuk

Sikat' kalasag, dika pulos agsanud

.

.

.

.

.

HAI. o9

Rudy Ram. Rumbaoa

wwwtaraontibiag.blogspot.com

#ilokodaniw #haiku #narasi #maawatan #kamang #kalasag #riribuk #kalasag #agsanud #taraontibiag #taraontikararua #rudyramrumbaoa

[Nabulod ti ladawan a nausar]

 

Haiku o3

Nakitak iti kinataok

ti pannakaiparakupok ti dara

iti daga ti inka panagbugsot...

.

.

.

.

.

HAI. o3

Rudy Ram. Rumbaoa

wwwtaraontibiag.blogspot.com

#ilokodaniw #haiku #nakitak #kinataok #pannakaiparakupok #dara $daga #panagbugsot #taraontibiag #taraontikararua #rudyramrumbaoa

[Nabulod ti ladawan a nausar]

Siak [Nga Awan Pategna]

Siak nga awan pategna kenka

kadagiti amin a maipateg,

kadagiti amin a maipaayan

iti kaasi, dayta ti kinapudno---

Ngem nasukogak tapno agserbi.

Kunak: O Apok ken Diosko,

agyamanak Kenka ta intedmo

kaniak ti nasagraduan a kararua

ngem gapu iti bukod nga aramid,

namulitan. Narakrak ken nalaokan

iti dakes a panagem. Ammok ti 

pannakasallukobko iti demontres,

ti met la bukodko a bagi ti masaktan

ken sugatak. Ket ti kannawan nga imak

ilabanna ti bumegbeggang a simpatia

iti pannakasallukobko di umanamong,

gapu ti daytoy, saanak a napalubosan

a lumung-aw gapu iti pananglemmesna

kaniak, ken di umanges tapno angsek

ti kinasin-aw ti angin; ken maipasdek

ti bukod a kinatalinaay a panagbiag.

Ginandatko nga iturong ti kinagartemna

iti taaw tapno ilemmesko ti mangpatignay

kenkuana, wenno tapno agsubli manen

Kenka, ngem diak pulos nagballigi.

Indulinna ketdi dagiti ramit nga aramatek

ta dagitoy naaramidda iti balikas

a naggapu ti agus ti bibigko. Pinampanunotko

ti kadawyan, ti kinasimple ngem tinuladna

babaen kadagiti immoralidad nga aramid.

Siak, para iti kappia ken isuna kukuana

ti gubat ket inaramidnak a kas 

pagaksawanna tapno matun-oyanna

nga uray pay iti oras ti kappia, agayus

ti dara ti gubat. Gapu kenkuana,

agsarimaddengak nga agsardeng tapno

tallikudak ken supringek ti pagayatanna;

ngem piman ta awan ti kabaelak.

Ket iti kampo ti serbisio ken panagbabawi,

ited ti paraitudo ti kaasina iti asidegko

tapno adda kabadangak ta kunak,

no daytoy dakes a panagem ket mapan

iti maysa a kampo tapno agsamsam,

ti kampo a panawanna, aglibasto.

Pinanunotko ket naaramid a kasta.

Umay latta ti pannakasulisog tapno

rippuogennak ken mawara ti puersak,

iti kasta, awan ti mabati kaniak

no di kampo ti Kaasina ket ammok

nga amin dagitoy a pannubok,

malasatakto, ket umaydanto kaniak

a nasaysayaat pay nga amang

ngem iti siudad a paglemmengan---

ket iti panagbiahek, agballigiak;

dagiti agsamsam, papanawek ida!

.

.

.

.

.

Siak [Nga Awan Pategna]

Rudy Ram. Rumbaoa

wwwtaraontibiag.blogspot.com

#siak #awanpategna #ilokodaniw #taraontibiag #rudyramrumbaoa

[Nabulod ti ladawan a nausar]