 |
| [nabulod ti ladawan] |
ni Rudy Ram. Rumbaoa
[nasurat idi 10.27.2006]
Adda sutil iti kinaulimek ti rabii
di agpakaturog, mariribukan ni Elsie;
No kuan, agasug iti napalaus, sana kuna:
"Ay Apo, kaasiannak kad, ala."
Idi, naparatut ni Elsie a makisarsarita
ngem itan mangrugin nga agsalog ti salun-atna,
Mariknanan ti napalaus a paksuy ken bannogna
no kasta nga agpagnapagna diay kalsada.
Desdes ti biag, kasta ti inna turongen
saanen a magawidan ti inna panagbaket,
Iti pitopulo a tawenna adun ti naparagsakna
iti apokona't tuod, annak ken bukodna a pamilia.
No kuan, kunana latta:
"Ay Apo, tulongannak kad ala,"
Ngem iti bukodna a pammati
iti mabiit, angesna't inna isubli.
Itay kallabes a tawen, pinalubosanna
immunan, napanen naginana't kaingutngotna,
Namnamaenna met a sumarunonto isuna
ngem nakasaganan a mangyawat kararuana.
"Ay Apo, ay Apo! Dimonto kad ida ikawa
uray awanak dennada, naragsakdanto koma,"
Kasta a kasta ti kanayon nga idawatna
sakbay a maturog nga agmaymaysa.
Di mabayag, simmangpet ti pamiliana
manipud abrod intugotda't annakda,
Di magawidan liday a nagari't kaungganda
makitada't Ina nga awanen angesna.
Saan a nagbayag indulinda't bangkayna
piman nga Elsie, dakkel a pakalaglagipanna,
Para kadagiti annakna, bannuar isuna
naitalimeng iti puso ken panunotda.
*[Lagip iti maysa nga Ina, nga uray nagsolsolo iti biag- kinabaelanna pay laeng nga insakad ti pamiliana. Maikkan ti napintas a masakbayan dagiti annakna. Wen, sinarangetna ti adu a pannubok: "Ti desdes ti biag gapu't ayat"].
[copyright [october 2006 by rudyram.rumbaoa]
No comments:
Post a Comment