No Agpannuray ni Ayat

[nabulod ti ladawan]

Napili a daniw Ita a Lawas

No Agpannuray ni Ayat
ni Rudy Ram. Rumbaoa
[nasurat idi 01/28/2007]





   
Tawen 1983, bulan ti Hulio.
Naitukit ti bukel ni karayo: Ayat.
Kadata, nagbalin nga inspirasion
Inaywananta agingga a nagsampaga...

Tawen 1986: Umuna a gundaway
Pannakasuot ti aginnadayo a puso: Naulila.
Sapulem ti gasat,
Parang-ayen rigat ti biag;
Kalpasan ti sangapulo a tawen
Kayatmon ti agsimpan.

Adu a rigat ken tuok
Kadagiti kakabsatmo-
Kadakuada imbubosmo amin a tiempo
Maited kadakuada't kalikagumam
Napintas a masakbayan.

Sangapulo a tawen
Nabattaway a panaguray;
Nayadayoka kaniak,
Ngem bitbitmo ti balligi
Nagsublika't arpad
Tapno mapasantak ni ayat.

Tawen dua ribu, nagabrodak
Tapno innak isagana-
Naulit panaginnadayo: Ngem adda panagtalek.
Komunikasion-tulbek ni ayat
Tapno maep-epan ti iliwko
Ket dagus a tawaganka
Tapno komustaenkayo,
Kasanokay' met ita?

Agaw-awis a pagbiddutan
Sulisog umar-arubayan
Adda apal ken panangsair
Nagpiesta't ngiwat ken lapayag,
Ngem pinarmekta ida
Iti pannakasuot ni ayat
Timmibker ti pundasionna.

Kalpasan iti uppat a tawen, imbanagka
Napudno ngamin ti ayat:
Adda sakripisio
Panaganus
Panatalek
Pammati
Komunikasion
Ken pammateg;
Amin dagitoy pinalagdana ti kari
Nagrangrang ti apuy a nangted bara
Iti relasion, saan met a napuyupoy
Nangted ketdi't lawag iti dana a tinalaytayta
Ket iti tunggal pannubok, nagbalinda a rangtay
Iti panakagun-odta nga agpadpada
Ti naranraniag a masakbayan ti pamilia.

[copyright/january.2007byrudyram.rumbaoa]