Taraon ti Biag...

[Ti Pangngarig Maipapan iti Naimbag a Samaritano]

Nasantoan a Mabasa:

Marso 28, 2011 [Lunes]
Deuteronomy 9
Deuteronomy 10
San Lucas :8: 4-21

Marso 29, 2011 [Martes]
Deuteronomy 11
Deuteronomy 12
San Lucas 8: 22- 39

Marso 30, 2011 [Mierkules]
Deuteronomy 13
Deuteronomy 14
Deuteronomy 15
San Lucas 8: 40-56
San Lucas 9: 1-6

Marso 31, 2011 [Huebes]
Deueteronom 16
Deuteronomy 17
San Lucas 9: 7-27

Abril 1, 2011 [Biernes]
Deuteronomy 18
Deuteronomy 19
Deuteronomy 20
San Lucas 9: 28-50

Abril 2, 2011 [Sabado]
Deuteronomy 21
Deuteronomy 22
San Lucas 9: 51-62
San Lucas 10: 1-12

Nasantoan a Mabasa Ita nga Aldaw, Abril 3, 2011 [Domingo]
Deuteronomy 23
Deuteronomy 24
Deuteronomy 25
San Lucas 10: 13-37

Mababalaw dagiti Ili a di Agbabawi
[Mat 11: 20-24]

"Asikanto pay, Corazin! Asikanto met, Betsaida! No naaramidmo koma diay Tiro ken Sidon dagiti milagro a naaramid kadakayo, nabayag koma nga impakita dagiti tattao sadiay ti panagbabawida kadagiti basbasolda babaen ti panagtugawda a sikakawes iti nakersang a lupot ken panangiwarakiwakda iti dapu kadagiti bagbagida. Inton Aldaw a Panangukom, dakdakkelto ti asi ti Dios iti Tiro ken Sidon ngem kadakayo. Ket sika Capernaum, kayatmo kadi a maitan-okkanto  sadi langit? Saan! Maitappuakkanto sadiay infierno."

Kinuna ni Jesus kadagiti adalanna, "Ti siasinoman a dumngeg kadakayo, siak ti denggenna; ngem ti saan nga umawat kadakayo, siak ti saanna nga awaten. Ket iti saan nga umawat kaniak, ti nangibaon kaniak ti saanna nga awaten."

Ti Panagsubli dagiti Pitopulo ket Dua

Nagsubli a siraragsak dagiti pitopulo ket dua. "Apo," kinunada, "uray dagiti demonio, nagtulnogda kadakami idi bilinenmi ida iti naganmo!"
"Nakitak ni Satanas a natnag a kas kimat manipud langit," insungbat ni Jesus. "Denggenyo: inikkankayo iti pannakabalin a mangbaddek kadagiti uleg ken manggagamma ken mangparmek iti bileg ti Kabusor. Awanto ti pakaan-anoanyo. Ngem saankayo koma nga agragsak gapu ta agtulnog dagiti dakes nga espiritu kadakayo, agragsakkayo ketdi ta naisurat dagiti naganyo sadi langit."

Agrag-o ni Jesus
[Mat 11: 25-27; 13: 16-17]

Iti dayta met la nga oras, pinunno ti Espiritu Santo ni Jesus iti rag-o. "Agymanak kenka, Ama, Apo ti langit ken daga," kinuna ni Jesus, "ta impakaammom kadagiti awan adalna ti inlimedmo kadagiti mamasirib ken kadagiti nasaririt. Wen, Ama, ta kasta ti nagayatam a maaramid."

"Intalek kaniak ni Amak dagiti amin. Awan ti makaammo iti Anak no di laeng ti Ama. Awan met ti makaammo iti Ama no di laeng ti Anak ken dagiti kayat ti Anak a pangipakaammoan kenkuana."

Kalpasanna, simmango ni Jesus kadagiti adalanna ket kinunana a sililimed, "Nagasatkayo gapu kadagiti makitkitayo ita! Ibagak kadakayo nga adu a profeta ken ari ti nagtarigagay a kumita kadagiti makitayo, ngem dida nakita; ken makangngeg kadagiti mangngegyo, ngem dida nangngeg."

Pangngarig maipapan iti Naimbag a Samaritano

Timmakder ti maysa a maestro iti Linteg a mangsuot ken Jesus, "Maestro," sinaludsodna, "ania ti masapul nga aramidek tapno magun-odko ti biag nga agnanayon?"
"Ania ti kuna ti Nasantoan a Surat?" kinuna ni Jesus. "Ania ti panagawatmo?"

"Ayatem ti Apo a Diosmo iti amin a pusom, iti amin a kararuam, iti amin a pigsam ken iti amin a panunotmo, ken Ayatem ti karrubam a kas iti bagim," insungbat ti maestro iti Linteg.

"Husto ti insungbatmo," kinuna ni Jesus. "Aramidem daytoy ket agbiagkanto."

Ngem kayat ti maestro iti Linteg nga ikalintegan ti bagina, isu't gapuna a nagsaludsod manen ken Jesus. "Siasino ti karrubak?"

Simmungbat ni Jesus: "Adda maysa a tao a naggapu idiay Jerusalem ket sumalsalog a mapan idiay Jerico. Sinaneb dagiti tulisan, innalada amin nga adda kenkuana agraman pagan-anayna, kinabkabilda sada pinanawan a dandanin matay. Nairana met a sumalsalog sadiay ti maysa a padi. Idi makitana daydi tao, linisianna ket intuloyna ti nagna. Simmalog met sadiay ti maysa a Levita, inasitganna ti tao ket kinitana, kalpasanna, linisianna met ket intuloyna ti nagna.

Ngem limmabas met sadiay ti maysa a Samaritano nga agbibiahe. Idi makitana ti tao, naasian kenkuana. Inasitganna ken sinapsapoanna dagiti sugatna iti lana ken arak sana binedbedan ida. Insakayna nga impan iti maysa a pagdagdagusan a nangtaripatoanna kenkuana.

Kabigatanna, nangala iti dua a pirak ket intedna iti agpadpadagus. "Taripatoem," kinunana kenkuana, "ket inton agsubliak, bayadakto amin a nagastom."

Kinuna ngarud ni Jesus, "Iti panagkunam, siasino kadagiti tallo ti pudno a karruba daydi tao a sinaneb dagiti tulisan?"

"Daydi nangngaasi kenkuana," insungbat ti maestro iti Linteg.

Kinuna ni Jesus, "Inka ngarud ket aramidem met ti kasta."