 |
| [Nabulod laeng ti ladawan a naaramat iti daniw] |
Nawatiwat a Panagdaliasat
Ni Rudy Ram. Rumbaoa
Kadaytoy taaw ti biag
Aglayagtayo ket iti uneg ti barko
Bangonen dagiti arapaap,
Ngem nagbalintayo a bulsek
A mangiturong iti umno a direksion
Gapu't kaawan panagannad
Iti paglintegan ti bukod a makinasion.
No dadduma, sumangladtayo kadagiti pantalan
A ditayo ammo gapu't iliw a panagwaywayas,
Ken arigtayo dagiti kaduogan a marino-
Aglayag kadagiti taaw nga awanan panagannad.
Awan pantalan a masarakantayo iti beddeng
Dagiti bagyo, wenno awan pagkamangan
A mangsalaknib iti bagi manipud kadagiti
Umatiwerret nga angin, awan pagablan
A pagsangladan dagiti barko a makita
Ket gapu iti daytoy, agnanayonto
Nga aglayagtayo nga awan pagngudoanna;
Ngem no ti Apo iti taaw ti biag
Mandarenna ti barko, iturongnatayto
Ti managayat ken naasi nga imana
Iti natalged a daga nga awan pakaan-anuantayo.
No comments:
Post a Comment