Dika Mangukom

Dadduma Pay...

[Nabulod laeng ti ladawan a naaramat]

Dika Mangukom
ni Rudy Ram. Rumbaoa

NAGDARDARAS a simrek ti doktor iti maysa a pampubliko nga ospital iti sentro ti Siudad ti Laoag kalpasan a nakaawat iti emergency call manipud kadagiti staff-na. Naawagan ti doktor tapno isayangkatna ti maysa nga emergency surgery. Nupay nakabakasion ti doktor iti dayta a gundaway, dinagusna a sinuktan ti pagan-anayna sa nagturong iti nasao nga ospital.

Saan pay a limmaem iti operating room idi makita ti doktor ti ama ti ubing a babai a mataming. Ammo ti doktor nga ur-urayen ti ama ti doktor ta langa daytoy ti agpaspasungad. Di makaidna, pagna a pagna. Di makatalna iti nagtakderanna. No kuan, kitaenna ti pagorasan.

Apaman a nakita ti ama a simmangpeten ti kasapulan a doktor a mangtaming iti anakna, nabugkawanna ti mangngagas. "Apay a kastoy ti kabayagna ti panaguraymi kenka? Saanmo kadi ammo nga adda iti peggad ti biag ti anakko? Adda iti ngarab ni patay? Awan kadi konsensiam a makipagrikna?"

Ngem sinuplian laeng ti doktor ti ama iti isem ket kinunana, "Despensarem, kabsat, awanak ngamin iti ospital itay awagandak dagiti staff-ko iti telepono. Addaak iti adayo a lugar. Nupay kasta, nagdardarasak a nagturong iti ospital apaman a naawatko ti kinaimportante ti mensahe. Ket ita ta addaakon, dawatek koma kenka nga agkalmaka tapno aramidek ti pagrebbengak."

"Agkalma, kunam? Ket no bilang ti anakmo ti adda iti kasasaad ti anakko, agkalmaka ngata? Agulimek lattan? Ket no ngay ti anakmo ti matay ita, ania ti aramidem? kuna ti ama a makaunget unay.

Ngem immisem manen ti doktor ket simmungbat iti naalumamay a boses: "Kayatko nga ibinglay kenka ti kuna ni Job iti Nasantoan a Biblia: 'Manipud iti tapok a naggapuan ken iti tapok met laeng iti pagsublian. Madaydayaw ti nagan ti Dios iti agnanayon!'' Awan pannakabalin dagiti doktor a mangyatiddog iti biag ti tao. Ala inka, aramidem ti makaay-ayo iti Dios ket agkararagka a sipapasnek, dumawat iti kaasi ket mamatiak a denggennakanto. Ket iti biangmi, naipakumit ti pagrebbengan ken responsibilidad a mangsalbar ti biag ti anakmo babaen iti pannarabay ti Dios."

"Ti panangipaay iti pammagbaga aglalo no saan a sika ti maseknan ket narigat nga awaten," nangato ti boses ti ama a simmungbat.

Saanen nga inkaso ti doktor ti dadduma pay tantanabutoben ti ama. Dagus a limmaem iti operating room. Naglabas ti sumagmamano nga oras, naragsak a rimmuar iti operating room ti doktor. "Yaman unay iti Dios ta nasalbaren ti anakmo. Nakalasaten iti peggad," kuna ti doktor iti ama. Saan nga inuray ti doktor ti sungbat ti ama ngem kinunana, "No adda kayatmo a saludsoden, damagem kadagiti nars." Kalpasanna, nagdardarasen a pimmanaw ti doktor.

"Apay a nakaar-arogante unay dayta a doktor? Apay a saan man la a nagbayag iti sumagmamano a minuto tapno pagsaludsodak koma no kasano ti estado ti anakko?" kuna ti ama idi makitana dagiti na-nurses a rimmuar iti operating room.

Makalulua unay ti maysa a nars a simmungbat iti ama: "Pimmusay ti balasangna itay nabiit iti maysa nga aksidente iti kalsada. Manarimaan ti pumpon ti balasangna itay tawaganmi. Pinanawanna ti pamumpon ket nagdardaras a nagturong iti ospital tapno annongenna ti pagrebbenganna bilang maysa a doktor. Ita ta nasalbar ti biag ti anakmo, nagdardaras met laeng a pimmanaw tapno maitulodna ti bangkay ti anakna iti kamposanto." Kalpasanna, tinapik ti nars ti abaga ti ama ket pinanawanna.

Kasla naipigket dagiti saka ti ama iti nagtakderanna. Mariknana ketdi a kasla adda nagsullat iti karabukobna ta awan man la maysa a balikas a nayesngaw ti bibigna...