Sursuroandak Man

[Nabulod ti ladawan a naaramat]


Agrigrigatak addaka nga agragragsak
Ramrambak a di maungpot, di mapugsat;
Pagbabaywak ita ti nagbalin a gasat
Pammagbaga diakto met ida impangak.

Akuek, tiempok amin idi kabambannuagak
Nasumok a dakes a bisio nayaw-awanak;
Nagduduma a ragsak binay-ak ti pamiliak
Pirak a ginastok kasla awan aniamanna kaniak.

Nakapantokkan, addaak pay laeng iti baba
Impasnekmot' nagadal ngem umap-apalak ita;
Napintasen ti trabahom idinto nga umakar-akarak
Gapu't kinabaliwegwegko diak naturpos karerak.

Pilid ti biag pudno a dayta ti maiparbeng
Ita ta mataenganakon nasakit nga akuen,
Ta no koma maisublik naglabas a panawen
Padasek komat' agubing ken agbaro manen;

Ngem nagbalin ti napalabas a pakaadalak
Tapno daytoy ti dalan a mangbalbaliw kaniak,
Ngem no maminsan sulisog aw-awisennak
Daytoy ti gapuna maitappuak-maikaranukonak.

Sursuroandak man, ala, idalandak,
Ipaay ti lawag tapno makitak ti pagnaak;
Didak koma upayen pataudenyot' namnamak
Tapno adda pagturongan naiwawa a masakbayak...



SURSUROANDAK MAN
Rudy Ram. Rumbaoa
Dagiti Koleksion a Daniw, sarita, Kanta ken Dadduma Pay
wwwtaraontibiag.blogspot.
[*Naadaw ti paulo ti daniw iti blog ni Ka Eddie iti Iluko.com]
[nasurat.11.23.2oo7/maui]