Ammok a Sika

[Nabulod ti ladawan a naaramat]


Sikat' silawko iti kasipngetan
Patiek, diakto mayaw-awan;
Sikat' mangidalan pagnaak
Dinak baybay-an, Sikat' pagkaptak.

Sikat' taklinko, pangyasugak
Amin a parikut ken problemak;
Sindadaan a mangsungbat kaniak
Uray narasiak ammok a pakawanennak.

Sikat' kamangko no umay riribuk
Sikat' kalasagko dika agsanud,
No awanka; anianto pay ngata
Siak nga adipenmo, no siak ti maiwawa?

Ket uray adut' biddut ken nagkurangak
No isu man pangiladawanda kaniak,
Iti pusok, ammok a Sika,
Ti Diosko a managayat ken mangilala.



AMMOK A SIKA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[cr/rrr]o1.2oo7.maui