Paskua ti Panagungar: Biag Nga Agnanayon

[Nabulod ti ladawan a naaramat]


Perfekto iti amin a kinaperfekto ti Dios
ta kalikagumanna ti perfekto a hustisia;
saanna nga impalubos nga itarayantayo
ti basol, ngem ginundawayantay' ketdi
ti sagutna tapno nawayatayo
nga agsalungasing: gapu daytoy,
nagserra ti ridaw ti langit, ditay' makastrek

Ngem masapul a maibukbok ti dara
a mangugas kadagiti basol: sakrifisio,
pagbabaywan di maikanatad
nga aramid ta uray napnot' ir-iruken
ti Dios, inay-ayatnatayo ti kasta unay;
imbaonnat' bugbugtong nga Anakna

Ipalagip ti Biernes Santo ti pannakapasag
ni Jesus iti kros-- awanan mulit
tapno maugasan ti lubong iti rugit, impaayna
ti bagina a kas daton tapno iti Paraiso,
makipagbiagtayo Kenkuana.

Iti umuna a bigat ti lawas,
nagsubli; pinarmekna ti patay,
bimmangon iti nakaitanemanna--
awanen ti bangkay.
Paskua ti panagungar: biag nga agnanayon,
nawayan ti lubong iti basol
makipagbiagtayo Kenkuana iti gloria!

  


PASKUA TI PANAGUNGAR: BIAG NGA AGNANAYON
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com