Apo ti Lubong

[Nabulod ti ladawan a naaramat]


Apo ti lubong
denggem ti salmo
kas iti insenso
alaem ti dawatko,
ti pusok,
inay-ayatnaka unay
nasapulanna ti bitla
a salibukag.

Agnanayon a kuriruenna
ti panunotko, ngem
iti maysa nga aldaw
agsubliakto tapno idawat
dagiti ar-araraw
siak a nanumo,
sapulek ti pamataudak.

Saan nga agserbi kaniak
ti magappuanak
gapu ta iti sakbayna,
pinaaddam ti amin;
nagloriaan a trabaho
ti Mannakabalin
ket awan pulos pinartuat
ti pusok ken imak.

Agpakumbaba,
agrukbabak Kenkuana
uray pay idi sakbay
nga impasngayna
ken sakbay daytoy
espera ti lubong--
naaramiden ti nailangitan
a kinatan-okna!



Napili a Daniw
APO TI LUBONG
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
[CR/RRR.Maui.12.2o12]