 |
| [Nabulod ti ladawan a naaramat] |
Ti Trabaho ni Pablo a maipaay kadagiti Gentil
Daytoy ti gapuna nga agkararagak iti Dios, siak ni Pablo a balud ni Cristo Jesus, gapu kadakayo a Gentil. Awan duadua a nadamagyon a babaen ti parabur ti Dios, intedna kaniak daytoy a trabaho a maipaay iti pagimbaganyo. Imparangarang ti Dios ti nalimed a planona ket impakaammona kaniak. [Insuratkon ti ababa a pakasaritaan daytoy; no mabasayo, maawatanyo no kasano ti pannakaammok iti palimed ni Cristo]. Saan a naipakaammo iti dayto a palimed kadagiti tattao, ngem imparangarangen ti Dios babaen ti Espiritu kadagiti nasantoan nga apostoles ken profetana. Daytoy ti palimed: Babaen ti ebanghelio, makipagtawid dagiti Gentil kadagiti Judio ti bendision ti Dios. Kamkamengda iti isu met la a bagi, ket mairamanda iti inkari ti Dios ken Cristo Jesus.
Nagbalinak nga adipen ti ebanghelio gapu iti naisangsangayan a sagut nga inted kaniak ti Dios babaen ti pannakabalinna. Siak ti kanummoan kadagiti nanumo a tattao ti Dios, ngem siak ti pinili ti Dios a mangipakaammo kadagiti Gentil iti di matukod a kinabaknang ni Cristo ken mangipakita kadagiti amin a tao iti pannakaibanag daytoy nalimed a plano ti Dios. Iti napalabas a tiempo, inlemmeng ti Dios a Namarsua kadagti amin a banag daytoy nalime a planona. Ita, babaen ti iglesia, maammuan dagiti agtuturay ken dagiti pannakabali sadi langit ti kinasirib ti Dios iti nadumaduma a pannakaiparangarangna. Kastoy ti inaramid ti Dios kas mayannurot iti agnanayon a panggepna a tinungpalna babaen ken Cristo Jesus nga Apotayo. Iti pannakaipagmaymaysatayo kenkuana, adda wayawayatayo nga umasideg a sitatalged iti sangngoanan ti Dios. Dawatek ngarud a dikay maupay iti panagsagabak gapu kadakayo, pagsayaatanyo amin daytoy.
Ti Ayat ni Cristo
Daytoy ti gapuna nga agparitintumengak iti sangngoanan ti Ama a paggapuan ti pudno a nagan ti tunggal pamilia idiay langit ken ditoy daga. Iti kinabaknang ti gloriana, dawatek nga itedna kadakayo ti pannakabalin ti Espirituna tapno bumileg ti akin-uneg a kinataoyo. Agnaed koma ni Cristo iti pusoyo babaen ti pammati. Ikararagko a mairamut ken maipasdekkayo iti ayat tapno dakayo ken dagiti amin a tao ti Dios, naan-anay ti pannakaawatyo no kasano ti kaakaba ken kaatiddog , ti kangato ken kauneg ti ayat ni Cristo. Wen, maamuantayo koma daytoy nga ayat, nupay saan a naan-anay a maammuan tapno mapnokayo iti awan pagkuranganna a kinaan-anay ti Dios.
Madaydayaw koma ti Dios a makaaramid iti nasurok ken aglablabes pay ngem ti dawaten wenno panunotentao babaen ti pannakabalin nga agtartrabaho kadakayo. Maipaay koma kenkuana ti dayaw ti iglesia ken ti dayaw ni Cristo Jesus, iti amin a tiempo ken iti agnanayon nga awan inggana. Amen.
No comments:
Post a Comment