Siak nga awan pategna kadagiti amin a maipatpateg
Ken dagiti amin a maipaayan ti kaasi,
Ta dayta ti kinapudno-
Ngem nasukogak tapno agserbi
Ta intedmo kaniak ti nasagraduan a kararua
Ngem gapu iti bukodko nga aramid, namulitan.
Naperdi ken nalaokan ti dakes a panagem
Ammok, ti pannakasallukobko iti demontres,
Ti met la bukodko a bagi ti masaktan ken sugatak.
Ket ti kannawan nga imak
Ilabanna ti bumegbeggang a simpatia
Iti pannakasallukobko a di umanamong,
Ket gapu ti daytoy, saanak a napalubosan
A lumung-aw gapu iti pannanglemmesna kaniak
Wenno umanges tapno angsek ti kinadalus ti angin;
Maipasdek ti bukod a kinatalinaay.
Ginandatko nga iturong ti kinagartemna iti taaw
Tapno ilemmesko ti mangpatpatignay kenkuana
Tapno agsubli manen Kenka,
Ngem diak pulos nagballigi.
Indulinna ketdi dagiti ramitko nga aramatek
Ta dagitoy naaramidda manipud iti ugis ti bibigko
Pinampanunotko ti kadawyan, ti kinasimple,
Ngem tinuladna babaen kadagiti immoralidad nga aramid.
Siak, para iti kappia ken isuna kukuana ti gubat
Ket inaramidnak a kas pagaksawanna tapno matun-oyanna
Nga uray pay iti oras ti kappia, agayus ti dara ti gubat
Gapu kenkuana masansan nga agsarimaddengak
Tapno tallikudak ken kontraek ti pagayatanna;
Ngem piman ta awan kabaelak.
Ket iti kampo ti serbisio ken panagbabawi, ipan ti paraitudo
Ti kaasina iti asidegko tapno adda kabadangak
Ta kunak, no daytoy dakes a panagem
Ket umayto iti maysa a kampo ket agsamsam,
Ti kampo a mapanawan, aglibasto.
Pinanunotko, ket naaramid a kasta.
Umay latta ti pannakasulisog tapno rippuogenna
Ken mawara ti puersak
Iti kasta, awan mabati kaniak no di ti kampo ti Kaasina
Ket ammok nga amin dagitoy a pannubok, malasatak,
Ken umayda kaniak a nasaysayaat pay
Ngem iti siudad a paglemmengan-
Ken iti panagbiahek, agballigiak
Ket dagiti agsamsam, papanawekto ida.
.
.
.
.
.
SIAK NGA AWAN PATEGNA
Rudy Ram. Rumbaoa
wwwtaraontibiag.blogspot.com
[Nabulod ti ladawan a nausar]
No comments:
Post a Comment