Siak Nga Awan Pategna

[Nabulod ti ladawan a naaramat iti daniw]

Siak nga awan pategna kadagiti amin 
A maipatpateg, wenno kadagiti amin
A maipaayan ti kaasi, dayta ti pudno-


Ngem nasukogak tapno agserbi
Kunak: O Apok ken Diosko, 
Agyamanak Kenka ta intedmo kaniak 
Ti nasagraduan a kararua ngem gapu 
Iti bukodko nga aramid, namulitan.
Naperdi ken nalaokan iti dakes 
A panagem ket ammok nga 
Ti pannakasallukobko iti demontres,
Ti met la bukodko a bagi ti masaktan
Ken sugatak. Ket ti kannawan nga imak
Ilabanna ti bumegbeggang a simpatia
Iti pannakasallukobko a di umanamong,
Gapu ti daytoy, saanak a napalubosan
A lumung-aw gapu iti pannanglemmesna
Kaniak, wenno umanges tapno angsek 
Ti kinapresko ti angin a malang-ab;
Maipasdek ti bukod a kinatalinaay.
Ginandatko nga iturong ti kinagartemna 
Iti taaw tapno ilemmesko ti mangpatpatignay 
Kenkuana tapno agsubli manen Kenka,
Ngem diak pulos nagballigi. Indulinna ketdi 
Dagiti ramitko nga aramatek ta dagitoy 
Naaramidda manipud iti ugis dagiti bibigko
Pinampanunotko ti kadawyan, ti kinasimple,
Ngem tinuladna babaen kadagiti immoralidad 
Nga aramid. Siak, para iti kappia ken isuna 
Kukuana ti gubat ket inaramidnak 
A kas pagaksawanna tapno matun-oyanna
Nga uray pay iti oras ti kappia, agayus ti dara 
Ti gubat. Gapu kenkuana, masansan 
Nga agsarimaddengak tapno tallikudak 
Ken kontraek ti pagayatanna; Ngem piman 
Ta awan kabaelak. Ket iti kampo ti serbisio 
Ken panagbabawi, ipan ti paraitudo
Ti kaasina iti asidegko tapno adda kabadangak
Ta kunak, no daytoy dakes a panagem
Ket umayto iti maysa a kampo ket agsamsam,
Ti kampo a mapawan, aglibasto. Pinanunotko
Ket naaramid a kasta. Umay latta ti pannakasulisog 
Tapno rippuogennak ken mawara ti puersak
Iti kasta, awanto ti mabati kaniak no di 
Ti kampo ti Kaasina ket ammok nga amin 
Dagitoy a pannubok, malasatakto,
Ken umaydanto kaniak a nasaysayaat pay
Ngem iti siudad ti paglemmengan-
Ket ti panagbiahek, agballigiakto
Dagiti agsamsam, papanawekto ida.


SIAK NGA AWAN PATEGNA 
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
wwwtaraontibiag.blogspot.com
[cr/rrr]12.2o12.maui