 |
| [Nabulod laeng ti ladawan a naaramat iti daniw] |
ni Rudy Ram. Rumbaoa
[nasurat.4.6.2007.maui]
Maalas-as a kas lasag
matuktukkol dagiti tultulang
maburayrayan dagiti lalaem
iti katengngaan ti kabakiran
atap nga ayup inda pagpiestaan
mabsog ken mapnekda a mangan:
kastoy iti panangiladawak-
ti karik kenka, nalupoyak.
Daytoy ti kinataok!
Pinasaplitanka
kinataawaan ken tinupraanka
imbalangatko kenka
ti korona ni patay,
ngem inawatmo daytoy
kas tanda ti panangipaay
ti bagi ken daram a maibuyat
tapno masubbot
ti basol ti sangataoan.
Ngem uray ita, awitmo latta nga agnanayon
ti kalbario dagiti mapasag a takneng-
ta uray siak no lissiak ti rugso ken gartem
maikaranukonak latta iti ngiwat ti sulisog
ket agbalin nga umel dagiti balikas
ta agari ti buteng ken panagulbod.
Wen, nasurok dua ribun a tawen napalabas
kaskasdi nga agkatangkatang-agkalkallautangak
iti di mapnek a bagi ti nataoan a tarigagay-
nakullaapan panunot
agsubli laeng a maidaknir
a mangimas latta ti gita
dagiti sugsog a lasag ti sardam...
RRR.abril.2007.iluko.com
No comments:
Post a Comment