Sursuruandak Man

Napili a Daniw Ita a Lawas

[Nabulod laeng ti ladawan a naaramat iti daniw]

Sursuruandak Man
ni Rudy Ram. Rumbaoa
[naadaw ti paulo ti daniw iti blog ni Ka Eddie iti iluko.com]
[nasurat.11.23.2007.maui]

Agrigrigatak addaka nga agragragsak
Ramrambak a di maungpot, di mapugsat;
Pagbabawyak ita ti nagbalin a gasat
Pammagbaga diakto met ida impangak.

Akuek, tiempok amin idi kabambannuagak
Nasumok dakes a bisio nayaw-awanak;
Nagduduma a ragsak binay-ak ti pamiliak
Pirak a ginastok kasla awan aniamanna kaniak.

Nakapantokkan, addaak pay laeng iti baba
Impasnekmot' nagadal ngem umap-apalak ita;
Napintasen ti trabahom idinto nga umakar-akarak
Gapu't kinabaliwegwegko diak naturpos karerak.

Pilid ti biag pudno a dayta ti maiparbeng
Ita ta lumakayakon nasakit nga akuen,
Ta no koma maisublit' naglabas a panawen
Padasek komat' agubing ken agbaro manen;

Ngem nagbalin ti napalabas a pakaadalak
Tapno daytoy ti dalan a mangbalbaliw kaniak
Ngem no maminsan sulisog aw-awisennak
Daytoy ti gapuna maitappuak-maikaranukonak.

Sursuruandak man, ala idalandak
Ipaay ti lawag tapno makitak ti pagnaak;
Didak koma upayen pataudenyot' namnamak
Tapno adda pagturongan naiwawa a masakbayak...

[c]november.23.2007.by.rudy.ram.rumbaoa]