Makirelasion ken ni Jesus

[Nabulod laeng ti ladawan a naaramat iti salaysay]

Makirelasion ken ni Jesus
ni Rudy Ram. Rumbaoa

ADU dagiti tattao iti saan a makaammo no kasano nga irugi ti pannakirelasionda ken ni Jesus. Masansan a marikna dagitoy a tattao nga awitda ti padeppa ti kalbario iti adu a responsibilidad. Dagiti dadduma, makarikna ti panagbabawi iti amin a naaramidanda a kamali wenno biddut. Arigna a mapilpilit dagitoy a tattao a mangawat ti balikas ti Dios nga agtaeng koma iti pusoda. Dagiti dadduma, agngatangata ken mayaw-awan ti panunotda.

Ngem ti kapintasan a banag nga aramiden tapno mabangon ti natibker a relasion ken ni Jesus ket isu ti panagtalek ken ti kaadda iti pammati Kenkuana. Agdawatka iti kaasina. Ta no adda kenka dagitoy iti uray sadino man a papanam, wenno kasano iti kaadayo ti papanam, wenno nagtengam, adda latta nga agnanayon a sumaranay kenka kadagiti pannubok nga inka paglasatan. Dika bumdeng a sumaranget kadagiti karit. No adda pannakapaay, adda met panagballigi. Adda latta iti sangngoanan, sikigan wenno likudan Isuna a nakasakagana a tumulong kenka. No adda biddut wenno basol a naaramidan, agbabawika.

Ti pannakirelasion iti Dios ket kas met iti pannakirelasion iti ay-ayaten. Adda dua a parte wenno paset ti pannakirelasion:Umuna, ti pannakipaset ti Dios kenka, ken ti Maikadua: Isu ti pannakipasetmo met Kenkuana.

Inaldaw nga ipaay kadatayo ti Dios ti pannakipasetna babaen iti panangipalubosna nga agriing, bumangon ken agbiag iti agdama. Naindaklan daytoy a sagut ti Dios. Inted ti Dios ti sagut a biag ket aniaman ti mabalin nga aramiden, aramidentayo gapu iti pagayatanna.

Nakasimsimple. Dawaten ken ni Jesus nga agtaeng iti puso ken mamati Kenkuana a tulongannaka. Ikidem dagiti mata, agtamed ken awaten ni Jesus a kas Apo ken Mangisalakan kenka. Ngem dika koma mangnamnama a dagus a maawatmo ti dawdawatem. Adda naituding nga oras ken tiempo nga ipaayna kenka ti kaasina. Awan mapasamak a mahika. Ngem maaramid daytoy gapu iti pagayatan ti Dios.

Daytoy a banag ket kas met iti panagmula iti bukel ken panangsibug iti mula, kasta iti panangimula ti Dios ti bukel kadatayo. Umuna nga agpang iti panangawat ken ni Jesus a kas Apo ken Mangisalakan. Ket manipud ditoy, adu dagiti banag a posible a mapasamak.

Ti pannakirelasion iti ay-ayaten, kasta met ti panagayat ni Jesus kadatayo. Ibilangnatayo a kas kameng ti pamiliana. Ngem masapul nga ayatentayo Isuna a kas miembro ti pamiliatayo. Iti pannakisarita kadagiti miembro ti pamilia, adda koma met itedtayo a tiempo a pannakisarita ken ni Jesus. No kabalinantayo nga ibusen ti oras a makidenna iti pamilia gapu ta ay-ayaten ken ipatpategtayo ida, maaramidtayo koma met ken ni Jesus.

Kas annak ti Namarsua, maawatantayo met ti nagkaadu a komplikasion ken kinakiro dagiti bambanag a karaman ditoy dagiti nadumaduma a sekta ken relihion nga agtaud iti agdama. Saan koma a dagitoy ti manglibeg iti panunot. Saandaka a maisalakan dagitoy a klase ti sekta wenno relrelihion. Sika a mismo ti makaisalakan iti bukodmo a bagi ken kararua babaen iti panangaramidmo iti pagayatan ti Dios. No kayatmo ti makapantok iti kangatuan a bantay, masapul a mangrugika a magna iti sakaananna ket in-inutka nga umuli nga agpangato.

No ditayo ikaso dagiti nagkaadu a komplikasion ken dagiti isyu a mabalin a pagsasaritaan a karaman iti daytoy simple nga akto ti ayat, kasano ngarud a marugian iti pannakirelasion ken ni Jesus?

Awan ti adu nga espesial ken nariknut nga aramiden. Simple, irugi babaen iti panagdawat Kenkuana nga agtaeng kenka-- iti puso. Ket manipud ditoy, in-inut ti pannakabangon ti kongkreto a relasion ken ni Jesus. Ta kas met iti agipatakder iti balay, masapul a mabuhosan ti pundasion tapno ditoy ti pagsadagan ken pangrugian ti mapatakder nga adigi ti pagtaengan.

Ket no adda panagduadua iti amin wenno ania ti kinapudno a kayatmo nga isapulan ti sungbatna, simple, agdamag. Damagen iti Dios ta ipakitana Kenka ti pudno ken ti dalan. Awan ti mailemmeng Kenkuana. Nakasagana iti agnanayon ta Isu ti biag, ti pudno ken ti dalan.

Awan ngatan ti kapintasan ken sabali a kayat nga aramiden ti maysa a tao ditoy lubong no di ti maaddaan iti relasion ken ni Jesus. Kayat ni Jesus a pasettayo met Kenkuana.