 |
| [Nabulod ti ladawan a naaramat] |
ni Rudy Ram. Rumbaoa
PUDNO ti kararag. Makatulong ti kararag.
Ammo dagiti ubbing daytoy. No mabutengda, kayatda nga agkakarag dagiti nagannakda. No adda masaktan, kayatdaka nga agkararag. No nakasaganadan iti pageddaanda, kayatdaka a mangibalikas iti kararag.
Ubbingda pay ngem ammodan a denggen dagiti nabalitokan a panursuro. Kayatda a denggen kadagiti nagannakda ti maipanggep dagiti karakter iti Nasantoan a Biblia. Iti sakbay ken kalpasan ti pannangan, kayatda ti agkararag. Uray sakbay iti pannaturogda, kayatda ti agkararag.
Inosente ken naganus a panunot ngem apay a kunada, "Tatang, agkararagka tapno awan ti dakes a mapasamak." Wenno kunada iti ina, "Nanang, ikararagam man ni Lolo." Kuna dagiti nagannak, "Masapul nga agkararagka sakbay a maturogka."
i. Ti Situasion Dagiti Agama
KAKAYATAN ni Angkuan, ti anak, nga agkararag ni Juan, ti ama, ngem saan a kayat ni Angkuan nga isu ti bida.
Maysa a nadagaang a rabii a nangan ti sibubukel a pamilia iti maysa a restauran iti puseg ti siudad ti Laoag. Kuna ni Juan, "Angkuan, sika, barok, ti mangidaulo ti panaglualo sakbay nga ipaunegtayo ti taraon."
Kinita ni Angkuan ni Juan kalpasanna, kinusilapanna ti ama. Nasiputan ti ama ta arigna a kasla naipiltak ti rugit iti rupa daytoy iti ikikita ti anak. Nagdumog ngarud ni Angkuan ket rinugiannan ti agkararag. Kunana, "Apo, tulongam kadi ni ama a saanak nga ipasungalngal nga agkararag. Ipakitam ken ipariknam kad kenkuana a diak kayat. Makaungetak laeng kenkuana. Bendisionam daytoy a taraon. Amen."
Ammo ni Angkuan [ngem saanna a kanayon nga admitiren], no ipategmo ti maysa a tao, ikararagam dayta a tao. Iti kinapeggad ti lubong, adut' sulisog ken karit, kasapulan dagiti ubbing ti kararag. Daytoy ngatan ti kangrunaan ken kaimportantian nga aramiden iti inaldaw-aldaw-- im-importante ngem dagiti trabaho iti opisina, dagiti pannakitaripnong, pannakiay-ayam, panagbuya iti telebision, panagdalus, kdpy.
Dagiti ubbing ket sagut manipud iti Dios, ket masapul a tratoem ida a nasayaat a kas kuna ni Jesus iti Nasantoan a Biblia, "Asino man kadakayo a mangawat kadagitoy nga ubbing, inawatdak metten." Wen pudno dayta, ket awan ti agballigi a nagannak no awan ti grasia manipud iti Dios. Saan laeng a proteheren/salakniban ti kararag dagiti annak iti ania man a wagas, ngem [1] papigsaen pay ti kararag ti kawar a kumamang iti Dios. No kanayonen ti makisarita Kenkuana, ad-adda a mariknam ti kaasidegna kenka. [2] Ti koneksionmo iti anakmo- ikararagam ida tapno maipalagip kadakuada dagiti kasapulanda ket mariknam ti kaasidegda kenka. [3] Ken ti koneksion ti anakmo kenka--no maammuanda nga ikarkaragam ida, mariknada ti kinatalged gapu ta ay-ayatem ida.
Masapul nga ibilangmo dagitoy tallo a nabileg a kawar nga ikakamang, mabalin a kunam iti bagim, apay nga agdawatka iti ad-adu pay? Maysa a makaparagsak iti rikna ti panagkararag, nangruna no mairaman iti kararag dagiti patpatgentayo iti biag.
Impudno ni Juan, "panangikararag kadagiti annak ket itdenna kaniak iti bang-ar ken ragsak ti riknak. Mariknak nga iturongnak iti umno a dana ti panagkararag, ngem no maminsan, alistoak a maisturbo. Isu a sakbay nga ikararag dagiti annakko, ikararagak nga umuna ti bagik. Ikararagko no mabalin a siak ti kasasayaatan a nagannak. No aramidek daytoy, masansan nga agkararagak babaen iti makuna a sangapulo a P's.
Kunak nga ikararag nga adda koma kaniak:
-purpose [gandat/panggep/tarigagay] idalan dagiti annakko iti umno a direksion.
-peace [kappia] agparbeng no mariribukan.
-perspective: makitak dagiti banag a kalikagum ti Dios.
-protectiveness: ipaay ti kinatalged babaen iti panangigaga iti amin a kabaelan.
-positibo a balikas: gutigoten ida iti tunggal karit nga adda iti masakbayan.
-pasyon wenno nasged a tarigagay babaen iti panangikumit ti bagi iti Dios, iti asawa ken dagiti annak.
-patience wenno panaganus babaen iti pannakaaramid dagiti banag iti pagayatan ti Dios.
-probision: itden kadagiti annak ti kangrunaan a kasapulanda.
-purity: kinatarnaw a pagulidanan ti umno a balikas nga isawang, aksion wenno aramid ken ugali.
-perseverance: ipakita ken iparikna ti pudno nga ayat kadagiti annak."
Ket intuloy ni Juan ti nagkuna, "No adda kaniak dagitoy sangapulo a kualidad ti biag, maipannakkelko a maysaak a nasayaat a nagannak. Ngem am-ammok ti bagik. Akuek nga iti tunggal aldaw nga aglabas, mapaayak a mangaramid iti isu amin a sangapalo a kualidad ti biag. Kalikagumak ti agbalin a nasayaat a nagannak, ngem diak maaramid nga agmaymaysa. Isut' gapuna nga agsadagak iti Dios tapno tulongannak. Kasta. Wen, kasta ti ar-aramidek."
[maituloyto...]
No comments:
Post a Comment