Makasursuroka a Mangbangon iti Pamilia

Dadduma Pay....

[Nabulod laeng ti ala a ladawan ti maysa a pamilia]

Makasursuroka a Mangbangon iti Pamilia

ni Rudy Ram. Rumbaoa

ITI diary ni Jeff:

"Orasnan!"

"Ita kadi?" sinaludsodko. Kasla bomba a nagipugso iti bara ti sibubukel a bagik ket urayak la napalagto iti katre. Nupay nalawag a mabasa iti digital clock nga alas tres kuarenta singko iti agsapa, siririing ti panunot ken bagik.

"Wen sa ketdi," kuna ni Mikaela.

Kaskam' la makikarkarera iti pegges ti naglugananmi iti panangunormi ti dalan nga agturong iti ospital. Iti unegmi ken ni Mikaela, Agpadakami a maay-ayatan. First-time parents, ngem naikambor met iti riknami ti panagnerbios. Apaman a nakadanon ken iplasplastarko ti lugan iti parking area ti ospital, iniggamak dagiti dakulap ni Mikaela ket kunak, "Saanton a dati ti panagbiagta."

Iti dayta a kanito a panangisawangko dagita a balikas, diak masinuno no pudno ken aniat' pagbanagan iti masakbayan ti balikas a naisawangko. No dagiti agasawa a mangpasangbay iti itatao ti umuna nga anakda ditoy lubong, kunada man nga amin a banag ket dagus a mabaliktad. Kayatna a sawen, addan pamiliamon. Ket ti pamilia ti umuna kadagiti isu amin a banag. Napatpateg ti pamilia ngem iti gayyem, kabagian wenno am-ammo.

Agbaliw ti linteg ti biag. Adda dagiti presyor, karirikna ken responsibilidad a napnoan rag-o ken kinaliday. Aywanam ti urnos ti pamilia, panagdakkel dagiti annak ken ipaayan ti pinansial a suporta dagiti mangnamnama kenka. Iparikna ti amin a pammateg iti panagdakkel ti maysa a parsua. Kinaagpaysuananna, adu dagiti babbaro a nagannak a dida ammo ti ar-aramidenda bayat ti pannakaipasngay ti umuna nga anakda. 

Mabalin nga adda dagiti naimbag a pagulidanan a nagannak idinto dagiti sabsabali, saan.

Kuna ngarud ni Jeff, "No koma laeng adda libro a mabalin a mangisuro ken mangilawlawag iti tunggal addang no kasano ti mangbangon ken mangpatanor iti perpekto a pamilia." Ngem daksanggasat, awan. Kinapudnona, awan nga agpayso ti makuna a perpekto a pamilia. 

Sangnguentayo ketdi dagiti karit ken pannubok. 

Tunggal pamilia- addaan iti nagduduma wenno sabalisabali a kobinasion ti nagtaudan wenno personalidad. Sangnguenda nga agpapada ti situasion. Awan ti makaliklik. Idinto nga awan met ti klase ti pormulasion ti pammatalged iti panakabangon ti naindaklan a pamilia, adda met dagiti maibilang a kapadasan-- pudno a paglintegan a mabalin a makatulong tapno suroten ti umno a direksion.

Ngem apay a kaaduan kadatayo ti saan a naragsak no maipanggep iti paglintegan ti pagsasaritaan? Mabalin a gapu ta pagbalinen ti lnteg ti biag a nainget wenno nasikkil ken napnoan balabala iti kaipapananna. No saan, patauden pay ti linteg/bilin ti naisupsupadi a karirikna tapno maamiristayo dagiti biddut wenno basol no ditayo suroten ti pagayatanna [ti linteg]. Ngem kayattayo man nga annugoten wenno saan, 'yeg met ti linteg ti sumagmamano a pakariknaan ti seguridad. Patauden [ti linteg] ti pagannurotan ken salaknibannatayo iti pannakaiyaw-awan, pagbasolan ken pannakakuso-kuso.

Tunggal pamilia, adda bukodna a maitudo a paglintegan wenno pammilin iti uneg ti pagtaengan. Kas koma: "Dimo dangran dayta. Aramidem dagita. Agsepilio iti ngipen, Dika agtakaw ken Isubli dagiti a banag nga innalam iti naggapuanna." Wen, makatulong amin dagitoy. No suroten ti bilin, naannayas ti taray ken turong ti pamilia. 

Ket no masalungasing ti linteg, agbalin a nakiro ti ayus ti pamilia.

Adda met dagiti paglitengan/pammilin a sapasap ti sakupenna. Iramanna ti kangrunaan a pagbatayan ti prinsipio ket maibilang daytoy nga importante no maidasig kadagiti maitudo a linteg/bilin. Dagitoy a paglintegan wenno pammilin ket aggapu a mismo iti personal nga ekspiriensa ti biag.

Ket intuloy ni Jeff:

Addan tallo nga annakmi ken ni Mikaela iti beinte a tawen a panagdennami a kas agasawa. Naragsak ti panagdedennami a sangapamilliaan. Ngem adda met dagiti kanito a saanmi a pagkikinnaawatan iti pamiliak. No maminsan, pagkatawaendak ti pamiliak, ray-awendak ken no dadduma pagpungtotendak. No maminsan, atipaendak iti planok a mapan idiay Amerika. No dadduma a panangidariragko a kayatkot' mapan idiay Amerika, kasta unay ti luksaw ti pamiliak. Diak ketdi ipilit ti kayatko. Ay-ayatek ti pamiliak ket ay-ayatenmi ti tunggal maysa uray pay adda dagiti kanito a saan a nasayaat ti langenlangenmi kadagiti napalpalabas nga aldaw. Patiek, agmawmawda ken saan nga agbayag.

Narigat met ti biag ti addaan iti pamilia. Nasursurok ketdi nga ipateg ti kinaimportansia dagitoy a pammilin wenno paglintegan gapu ta kasla makitkitak ti mabalin a mapasamak wenno ibungana no maburak ken mawatakwatakda. Agsursuroak pay laeng a mangbangon iti pamiliak, ngem adun ti nagsayaatan ken nagimbagak kalpasan ti maysa wenno dua a tawen. Ken namnamaek nga ad-adu pay ti masursuro ken pakaadalak maysa a tawen wenno dua manipud ita.

Importante met ti paglintegan wenno dagiti bilin manipud iti propesional ken personal nga ekspiriensa, ngem saanda a kangrunaan a pagbatayan.

Kamaudianna kuna ni Jeff: "Nadiskobrek amin dagitoy kas psychologist ken counselor - nagbatayak ti Nasantoan a Biblia. Ti balikas ti Dios nga isu a mismo ti pondasionko; daytoy ti pakabuklan ti reperensia, ammok ken saanakto nga agulbod iti kinapudno.

Ken ti pudno 'yegna ti kaipapanak.